බල්ගේරියානු වෙරළ සීමාව ආසන්නයේ යාත්‍රා කළ භාණ්ඩ ප්‍රවාහන නෞකාවකට පසුගියදා ඩ්‍රෝන ප්‍රහාරයක් එල්ල වීමත් සමඟ නෞකාව ගිලී ගොස් ඇති බව Cyber World Press අනාවරණය කරයි.
එහි සිටි 15 දෙනකුගෙන් සමන්විත කාර්ය මණ්ඩලයේ සාමාජිකයන් 11 දෙනකු අතුරුදන් වී ඇතැයි ද වාර්තා වේ.
බල්ගේරියානු රජය නිවේදනය කැර ඇත්තේ අතුරුදන් වූ නාවිකයන් සොයා මෙහෙයුම් ආරම්භ කැර ඇති බවයි. අතුරුදන්වූ නාවිකයන් සිරියානු හා ඊජිප්තු ජාතිකයන් බවට තොරතුරු වාර්තා වී ඇති බව Cyber World Press අනාවරණය කරයි.සතියක් ඇතුළත කළු මුහුදේ නෞකාවකට ඩ්‍රෝන ප්‍රහාර එල්ල වූ දෙවැනි අවස්ථාව මෙය බව ද වාර්තා වේ. මීට දින කිහිපයකට පෙර යුක්රේන හා අසර්බයිජාන් ජාතිකයන්ගෙන් සමන්විත කාර්ය මණ්ඩලයකින් යුතු භාණ්ඩ නෞකාවක් ඩ්‍රෝන ප්‍රහාරයට ලක්වූ අතර, එහි සිටි කාර්ය මණ්ඩලයේ 15 දෙනා නිරුපද්‍රිතව මුදා ගැනීමට බල්ගේරියානු වෙරළාරක්ෂක බළකාය සමත්වී තිබේ.
කළු මුහුදේදී වාණිජ නෞකා ඉලක්ක කරමින් පිට පිට එල්ල වූ මේ ඩ්‍රෝන ප්‍රහාර හෙළා දකිමින් බල්ගේරියානු අගමැති රුමෙන් රාඩෙව් ප්‍රකාශයක් නිකුත් කැර ඇති අතර, ඔහුගේ චෝදනාව එල්ල වී ඇත්තේ රුසියාවට බව වාර්තා වේ.
අතුරුදන්වූ නාවිකයන් සොයා ගැනීම සඳහා අගමැතිවරයා නේටෝ සංවිධානයෙන් හා යුරෝපා සංගමයෙන් ගුවන් නිරීක්ෂණ සහය ඉල්ලා තිබේ. මේ ප්‍රහාර සම්බන්ධව කරුණු විමසීම සඳහා බල්ගේරියාවේ රුසියානු තානාපතිනිය ඉලෙනෝරා මිට්රෝෆනෝවා කැඳවා ඇති අතර, ඇය සඳහන් කැර ඇත්තේ එවැනි ප්‍රහාරයක් පිළිබඳ රුසියානු ආරක්ෂක අමාත්‍යාංශයෙන් කිසිදු තොරතුරක් ලැබී නැති බවයි. එය තුන්වැනි පාර්ශ්වයක් විසින් සිදු කරනු ලැබූ ප්‍රහාරයක් විය හැකි බව ද රුසියානු තානාපතිනිය වැඩිදුරටත් සඳහන් කැර තිබේ.
