ජම්මු – කාශ්මීර් ප්‍රාන්තයේ ජනතාවගේ ස්වයං තීරණ අයිතියට සහය පළ කරමින් ඉස්ලාමීය සහයෝගිතා සංවිධානය සම්මත කළ යෝජනාව ඉන්දියාව දැඩි ලෙස ප්‍රතික්ෂේප කැර ඇති බව වාර්තා වෙයි.
පසුගියදා ඉරාකයේ බැග්ඩෑඩ් නුවර පැවති ඉස්ලාමීය සහයෝගිතා සංවිධානයේ විදේශ ඇමැතිවරුන්ගේ රැස්වීමේදී එම යෝජනාව සම්මත වීමෙන් දිනකට පසුව ඉන්දීය විදේශ අමාත්‍යාංශය මේ අදහස් පළ කැර ඇතැයි එරට මාධ්‍ය වාර්තා කළ බව Cyber World Press අනාවරණය කරයි.
එම රැස්වීමේදී ඉන්දියාව පිළිබඳ සඳහන් කැර ඇති කරුණු ද්වේෂසහගත, පක්ෂපාතී සහ අසත්‍ය බවත්, ඉන්දියාවේ අභ්‍යන්තර කටයුතු පිළිබඳ අදහස් දැක්වීමට එම සංවිධානයට කිසිදු නෛතික අයිතියක් හෝ බලයක් නොමැති බවත් නිවේදනයක් නිකුත් කරමින් ඉන්දීය විදේශ කටයුතු අමාත්‍යාංශය වැඩිදුරටත් ප්‍රකාශ කැර තිබේ.
ඉන්දීය රජය එරට ආණ්ඩුක්‍රම ව්‍යවස්ථාවේ 370 වැනි වගන්තිය ඉවත් කිරීමෙන් පසු ගත වූ වසර කිහිපය ඇතුළත ජම්මු කාශ්මීරයේ සැලකිය යුතු ආර්ථික වර්ධනයක් සිදුවී ඇතැයි ද, යටිතල පහසුකම් සංවර්ධනය, සංචාරක ව්‍යාපාරය සහ සන්නිවේදන සම්බන්ධතා හරහා එහි ජනතාවට ඍජු ප්‍රතිලාභ ලැබී ඇතැයි ද එම නිවේදනයේ සඳහන් වේ.
පාකිස්තාන පාලනයේ පවතින කාශ්මීරයේ තත්ත්වයට සාපේක්ෂව ජම්මු කාශ්මීරය සහ ලඩාක් පරිපාලන කලාපවල තත්ත්වය සහමුලින්ම වෙනස් බවත්, පාකිස්තාන පාලනය යටතේ පවතින කාශ්මීරයේ සිවිල් විරෝධතාකරුවන්ට එරෙහිව හිංසනය, මර්දනය ඇතුළු බරපතළ මානව හිමිකම් උල්ලංඝනය කිරීම් සැඟවීමට නොහැකි වී ඇති බවත් ඉන්දීය විදේශ කටයුතු අමාත්‍යාංශය ප්‍රකාශ කැර තිබේ.
