අමෙරිකාව සහ ඉරානය අතර පවතින ගැටුම්කාරී තත්ත්වය සමනය කැර සාමකාමී එකඟතාවයකට පැමිණීම සඳහා තවත් සති දෙකක කාලයක් සටන් විරාමය දීර්ඝ කිරීම කෙරෙහි දෙරටේ අවධානය යොමුව ඇති බව විදෙස් මාධ්‍ය සඳහාන් කරයි.

සාම සාකච්ඡා සඳහා වැඩි කාලයක් ලබා ගැනීමේ අරමුණින් මෙම පියවර ගැනීමට දෙපාර්ශ්වයම සලකා බලමින් සිටින බව මෙම සාකච්ඡා පිළිබඳ සමීප ආරංචි මාර්ගවලින් අනාවරණය වෙයි.

 කෙසේ වෙතත්, අමෙරිකානු ජනාධිපති ඩොනල්ඩ් ට්‍රම්ප් මේ සම්බන්ධයෙන් පරස්පර ප්‍රකාශයක් සිදු කැර ඇති අතර, ඔහු අවධාරණය කරන්නේ ඉරානය සමඟ එවැනි සටන් විරාමයක් දීර්ඝ කිරීම පිළිබඳව තමන් මෙතෙක් සලකා බලා නොමැති බවයි.

ඉරානයෙන් අනතුරු ඇඟවීමක්

මේ අතර ඉරානයේ කටම් අල්-අන්බියා මධ්‍යම මූලස්ථානයේ අණදෙන නිලධාරී අලි අබ්දුල්ලාහි පවසන්නේ, එක්සත් ජනපදය තම අවහිර කිරීම දිගට ම කරගෙන ගොස් “ඉරානයේ වාණිජ යාත්‍රා සහ තෙල් ටැංකි සඳහා අනාරක්ෂිත බවක්” ඇති කළහොත්, එය “සටන් විරාමය උල්ලංඝනය කිරීමේ පූර්ව නිගමනයක්” වනු ඇති බවයි.

අවහිර කිරීම දිගට ම පැවතුණහොත් ඉරානයේ සන්නද්ධ හමුදා “පර්සියානු ගල්ෆ්, ඕමාන් මුහුද සහ රතු මුහුදේ සියලු ම ආනයන සහ අපනයන නවත්වන බවට” ඔහු අනතුරු ඇඟවීය. එය කුමන රටවලට බලපානු ඇත්දැයි ඔහු සඳහන් නොකළ අතර, නමුත් ඔහු සඳහන් කළ මුහුදු ප්‍රදේශය ඉතා විශාල කලාපයක් ආවරණය කරයි.

එක්සත් ජනපද හමුදා විසින් ඉරාන වරායන් අවහිර කිරීම පසුගිය සඳුදා ආරම්භ කරන ලදී.
බදාදා, එක්සත් ජනපද හමුදාව පැවසුවේ පළමු පැය 24 තුළ කිසිදු නෞකාවකට සිය අවහිර කිරීම් හරහා යාත්‍රා කිරීමට නොහැකි වූ බවත්, වෙළෙඳ නැව් හයකට ඕමාන් බොක්ක ආශ්‍රිත මුහුදෙන් ආපසු හැරී යෑමට සිදුවූ බවත් ය.

යළි සාකච්ඡා ආරම්භය !

ඉරානය, අමෙරිකා එක්සත් ජනපදය සහ ඊශ්‍රායලය අතර සති හයකට ආසන්න සටනකින් පසුව, අබ්දුල්ලාහි විසින් සඳහන් කරන ලද අමෙරිකා එක්සත් ජනපද-ඉරාන සටන් විරාමය අප්‍රේල් 8 වැනි දින ප්‍රකාශයට පත් කරන ලදී.
ඉරානය සහ අමෙරිකා එක්සත් ජනපදය අතර පළමු වටයේ සාකච්ඡා අසාර්ථක විය. කෙසේ වෙතත්, ඉදිරි දින දෙක තුළ සාකච්ඡා නැවත ආරම්භ කළ හැකි බව ඩොනල්ඩ් ට්‍රම්ප් පැවසූ නමුත්, ඉරානය මෙතෙක් එය තහවුරු කැර නොමැත.

හෝමුස් සමුද්‍ර සන්ධියේ නෞකා ගමනාගමනයට ඉරානයෙන් විශේෂ යෝජනාවක්

අමෙරිකාව සමඟ පවතින ගැටුම්කාරී තත්ත්වය සමනය කැර ගැනීමේ එකඟතාවයක කොටසක් ලෙස, හෝමුස් සමුද්‍ර සන්ධියේ ඕමාන් පාර්ශ්වයට අයත් මුහුදු තීරය හරහා නෞකාවලට නිදහසේ ගමන් කිරීමට ඉඩ ලබාදීම කෙරෙහි ඉරානයේ අවධානය යොමුව ඇති බව විදෙස් මාධ්‍ය සඳහාන් කරයි.

ටෙහෙරාන් පාලනය ඉදිරිපත් කැර ඇති මෙම යෝජනාවට අනුව, අදාළ මුහුදු සීමාව හරහා ගමන් කරන නෞකාවලට කිසිදු ප්‍රහාරාත්මක තර්ජනයකින් තොරව ගමන් කිරීමට අවස්ථාව සැලසෙනු ඇත.

නව යුදමය ගැටුමක් ඇතිවීම වැළැක්වීම සඳහා අමෙරිකාව සමඟ පවතින සාකච්ඡාවලදී මෙම යෝජනාව ඉදිරිපත් කැර ඇති බව ටෙහෙරාන් ආරංචි මාර්ග උපුටා දක්වමින් විදෙස් මාධ්‍ය පෙන්වා දෙයි.

(උපුටා ගැනීම් – hirunews)

මුලාශ්‍ර :

US says it has not requested Iran ceasefire extension but ‘ongoing’ talks are ‘productive’

US, Iran Consider Extending Ceasefire To Buy Time For Peace Talks: Report