මීගොඩ හයිලෙවල් මාර්ගයේ පැවැති වෙසක් දන්සලක පෝලිමක සිටි පිරිසක් කැබ් රථයකින් යටකර 06 දෙනෙක් මරණයට පත්කර 07 දෙනකු තුවාල සිදුකළ බේබදු රියැදුරුට එරෙහිව දණ්ඩ නීති සංග්රහයේ උපරිම චෝදනාවක් වන මිනිස් ඝාතන චෝදනාව ඇතුළු චෝදනා 10ක් ගොනුකර හෝමාගම මහේස්ත්රාත් අධිකරණයට ඊයේ (01) ඉදිරිපත් කිරීමෙන් අනතුරුව ලබන 16දා දක්වා රක්ෂිත බන්ධනාගාරගත කළ බව නියෝජ්ය පොලිස්පති පද්මිණි රණවක මහත්මිය පැවසුවාය.
මෙසේ රක්ෂිත බන්ධනාගාරගත කර ඇත්තේ පිළියන්දල පදිංචි 42 හැවිරිදි පත්මකුමාර නමැති අයෙකි. ඔහු ගරාජයක් පවත්වාගෙන යන පුද්ගලයෙක් බව පොලීසිය පවසයි.
රිය අනතුරකදී පුද්ගලයෙක් මිය යෑමක් සම්බන්ධයෙන් රථවාහන නීතියට අනුව රියැදුරෙකුට එරෙහිව චෝදනා ගොනුකරනු ලබන්නේ නොසැලකිලිමත්ව ධාවනය කිරීමෙන් මරණය සිදුකිරීම සම්බන්ධයෙන් බව රථවාහන හා මාර්ග ආරක්ෂාව දිසාව භාර නියෝජ්ය පොලිස්පති ඩබ්ලිව්.පී.ජේ. සේනාධීර මහතා පැවැසීය.
එහෙත් මෙම අනතුර එවැනි අනතුරක් නොව, මිනිස් ජීවිත රැක ගැනීමට රියැදුරුට කොතෙකුත් අවස්ථාවක් තිබුණද දැන දැනම චේතනාන්විතව මරණ සිදුකර ඇති බව විමර්ශනයේදී පෙනී ගියේ යැයි නියෝජ්ය පොලිස්පතිවරයා පැවැසීය. ඒ අනුව රියැදුරාට එරෙහිව මිනීමැරුම් චෝදනාව ගොනුකරන බවත් අපරාධ නීතියේ උපරිම චෝදනාව ඒ අනුව ඔහුට ගොනු කිරීමට පියවර ගන්නා බවත් නියෝජ්ය පොලිස්පතිවරයා අවධාරණය කළේය.
මිනී මැරුම යන චෝදනාවට අධිකරණයෙන් වරදකරු උවහොත් පරිම දඬුවම මරණීය දණ්ඩනයයි.
අනතුර සිදුවන අවස්ථාවේදී රියැදුරාට විධිමත් රියැදුරු බලපත්රයක් තිබී නැති බවත් වාහනයේ බලපත්ර පවා කල් ඉකුත් වී තිබී ඇති බවත් නියෝජ්ය පොලිස්පතිවරයා කීය.
අනතුර සිදුකර කැබ් රථය පලාගොස් ඇති බවත් කැබ් රථය නතරකර රියැදුරු අත්අඩංගුවට ගන්නේද අනතුර වූ ස්ථානයේ සිට කිලෝමීටර් හතරකට ආසන්න දුරකින් බව මීගොඩ පොලීසිය සඳහන් කරයි. කැබ් රථය නතර කරගෙන ඇත්තේද එම රථය පසුපස පොලීසිය හඹාගොසිනි.
මෙම රථයේ හිමිකරු සහ තවත් අයෙක් අනතුර වූ අවස්ථාවේදී එහි රැඳී සිට ඇති බවට තොරතුරුද පොලීසියට ලැබී ඇත. ඔවුන්ව අත්අඩංගුවට ගැනීමට ද විමර්ශන පැවැත්විණි. ඒ අයට ද එරෙහිව නඩු පවරණ බව නියෝජ්ය පොලිස්පති සේනාධීර මහතා පැවැසීය.
කැබ් රථය හයිලෙවල් මාර්ගයේ අවිස්සාවේල්ල දෙස සිට ධාවනය වෙමින් තිබී ඇතැයි නියෝජ්ය පොලිස්පතිවරයා කීය. අනතුර සිදුව ඇත්තේ කැබ් රථය ලොරි රථයකට ඉස්සර කිරීමට යාමේදී බව විමර්ශනයේ දී අනාවරණය වී තිබේ. ලොරියට ඉස්සර කිරීමට යාමේ දී ඉදිරියෙන් පැමිණි වාහනයක් නිසා එකවර ඔහුට කැබ් රථය ඉස්සර කිරීමට නොහැකි වී ඇති බවත් එහිදී ඔහු ලොරි රථයට වම්පසින් රථවාහන නීතියද උල්ලංඝනය කරමින් ඉස්සර කිරීමට යාමේදී මෙම අනතුර සිදුව ඇති බව ද විමර්ශනවලින් අනාවරණය වී ඇත.
මුලින්ම කැබ් රථයේ ගැටී ඇත්තේ රොටි දන්සලේ පෝලිමේ සිටි 07 දෙනෙකි. ඔවුන්ගේ දෑත්වල කැබ් රථයේ බඳ වැදී ඇති බවත් ඒ මොහොතේ කැබ් රථය නතරකරනු ලැබුවේ නම් මිනිස් ජීවිත හානියක් නොමැතිව තත්ත්වය පාලනයකර ගැනීමට හැකියාවක් තිබුණු බව ද නියෝජ්ය පොලිස්පතිවරයා කියයි. බීමතින් සිටි රියැදුරාගේ නොහික්මුණු කම නිසාම රථය නොනවත්වා ධාවනයකර ඇති බවත් එවිට දන්සල් පෝලිමේ සිටි 06 දෙනකු යටකර මරා දමමින් රථය තවදුරටත් ධාවනයකර ඇති බවත් නියෝජ්ය පොලිස්පතිවරයා පැවැසීය.
මියගොස් ඇත්තේ වයස අවුරුදු 35ත් 38ත් අතර වයස්වල පසුවන හංවැල්ල, පිළියන්දල සහ අවිස්සාවේල්ලේ පදිංචිකරුවන් පිරිසකි. ඒ අතර අවුරුදු 15ක දැරිවියක් සහ 56 හැවිරිදි කාන්තාවක් වන බව පොලීසිය සඳහන් කරයි.
මිනිස් ජීවිත සතේකට මායිම් නොකර මෙසේ දන්සලේ සිටි පිරිසක් යටකර නොනවත්වා ධාවනය කළ කැබ් රථය ගැන 119 පොලිස් හදිසි ඇමතුම් අංශයට අවට සිටි පිරිස් දැනුම් දී ඇත. රාත්රී 11.57ට පමණ සිදුවූ ඒ අනතුර සම්බන්ධයෙන් විනාඩි 04ක් වැනි සුළු කාලයක් තුළ 119 හදිසි ඇමතුම් අංශයට තොරතුරු ලබා දී තිබී ඇතැයි පොලීසිය සඳහන් කරයි. මිරිහානේ පිහිටි පොලිස් හදිසි ඇමතුම් අංශය විසින් ද ක්ෂණිකවම මීගොඩ පොලීසිය දැනුවත් කර තිබේ. ඒත් සමඟම මීගොඩ පොලීසියේ දුරකතන ක්රියාකාරු ඒ බව පොලීසියේ වට්ස්ඇප් සමූහයකට යොමුකර ඇත. ඒම පණිවුඩය ඒ වන විට ගොඩගම නගරයේ රථවාහන රාජකාරියේ සිටි නිලධාරීන්ටත් ජංගම පොලිස් රථයේ රැඳී සිටි නිලධාරීන්ටත් තත්පර කිහිපයක් තුළ ලැබී තිබේ.
ගොඩගම හන්දිෙය් සිටි රථවාහන අංශයේ නිලධාරීන් ඒ මොහොතේ කැබ් රථය ගැන විමසිලිමත්ව සිට ඇතැයි නියෝජ්ය පොලිස්පතිවරයා කීය. මද වේලාවක් ගතවන විට වේගයෙන් කැබ්රථය ගොඩගම හන්දිය පසුකර ධාවනය වී තිබේ. අනතුර වූ ස්ථානයේ සිට ගොඩගම හන්දියට දුර කිලෝමීටර් 3ක් පමණ වන බව සඳහන්ය.
රථවාහන අංශයේ නිලධාරීන් කැබ් රථය පසුපස මීටර් 700ක් පමණ දුර හඹා ගොස් රථය නතරකර රියැදුරු අත්අඩංගුවට ගෙන ඇත. ඒ වන විටත් එහි සිටි බව කියන රථයේ හිමිකරු සහ අනෙත් පුද්ගලයා අතරමඟින් බැස පලා ගොස් ඇති බව පොලීසිය කියයි. අනතුරක් කර පලායෑමට ආධාර අනුබල දීම සම්බන්ධයෙන් ඔවුන්ට එරෙහිව පියවර ගන්නා බව පොලීසිය සඳහන් කරයි.
දිට්වා සුළි කුණාටුව ඇතිවූ අවස්ථාවේදී අවදානම නොතකා මගී ජීවිත අනතුරේ හෙළමින් ගංවතුරේ බස් රථයක් ධාවනයකර මගීන් දෙදෙනකුගේ ජීවිත අහිමිකළ අනුරාධපුර කලාඔය අනතුරට සම්බන්ධ බස් රථ රියැදුරුටද මිනිස් ඝාතන චෝදනාව ගොනුකර ඇත.
මෙරට ඉතිහාසයේ දරුණුතම අනතුරක් ලෙස සැලකෙන පොල්ගහවෙල යාල්ගල්මෝදර අනතුරේ බස් රථ රියැදුරුට එරෙහිවද ගොනුකරුනු ලැබුවේ මිනීමැරුම් චෝදනාවයි.
2005 වසරේ අප්රේල් 27 වැනිදා ගේට්ටු වසා දමා තිබියදී දුම්රිය හරස් මාර්ගයක් ඔස්සේ මගී බස් රථයක් අනාරක්ෂිතව ධාවනය කිරීමට ගොස් දුම්රියේ බස් රථය ගැටී සිදුවූ එම අනතුරින් මගීන් 41 දෙනෙක් මියගොස් තිබුණි. මෙහිදී රියැදුරුට අමතරව කොන්දොස්තරවරයාටද මිනීමැරුම් චෝදනාව එල්ලවූ අතර දීර්ඝ නඩු විභාගයකින් පසු කුරුණෑගල මහාධිකරණය මඟින් ඓතිහාසික නඩු තීන්දුවක් ප්රකාශයට පත්කරනු ලබන්නේ 2013 වසරේදීය. ඒ රියැදුරු සහ කොන්දොස්තරට මරණීය දණ්ඩනය නියම කරමිනි. මෙම අනතුරින් මගීන් 27 දෙනකු තුවාල ලැබීය. ඒ අයව ඝාතනය කිරීමට තැත් කළ බවට වූ චෝදනාවද රියැදුරු සහ කොන්දොස්තරට එල්ලවිය. ඒ සම්බන්ධයෙන්ද වසර 10ක බරපතළ වැඩ ඇතිව සිරදඬුවම්ද අධිකරණය විසින් නියම කරන ලදි.
මේ හැරුණුකොට 2009 වසරේ මැයි 16 වැනිදා වැලිකන්ද සෙවණපිටියේදී ළදරු පාසලක දරුවන් සහ දෙමාපියන් පිරිසක් රැගත් බස් රථයක් වසා තිබූ දුම්රිය ගේට්ටු අතරින් රිංගා ධාවනයකර ඉන්ධන දුම්රියක ගැටීමෙන් සිදුවූ අනතුරකින් මගීන් 15 දෙනෙක් මියගොස් 40 දෙනෙක් තුවාල ලැබීය. එම අනතුරින් රියැදුරුට එරෙහිවද මිනීමැරුම් චෝදනා පොලීසිය ගොනු කළේය. 2023 වසරේ සැප්තැම්බර් 22 දා පොලොන්නරුව මහාධිකරණය විසින් රියැදුරුට එරෙහිව මරණීය දණ්ඩනය නියම කරනු ලැබීය.
නුගේගොඩ ගුවන් පාලම මතදී 2020 වසරේ ජූලි මාසයේදී මගී බස් රථ දෙකක් තරගයට ධාවනයකර ඉදිරියෙන් පැමිණි හමුදා කැබ් රථයක ගැටී හමුදා සෙබළෙක් මියයාම සම්බන්ධෙයන්ද බස් රථ රියැදුරන්ට නඩු පවරනු ලැබුවේ මිනීමැරුම් චෝදනාව යටතේය. එකී නඩුවේ තීන්දුව නිකුත් වීමට නියමිත බව සඳහන්ය.
රිය අනතුරු සම්බන්ධයෙන් රියැදුරන්ට මිනිස් ඝාතන චෝදනා එල්ල කිරීම් සම්බන්ධයෙන් මෙවැනි උදාහරණ රැසක් ඇති අතර මරණීය දණ්ඩනය නියම වූ රියැදුරන්ද රැසක් සිටින බව පොලිස් තොරතුරු සඳහන් කෙළේය.
( දිනමිණ ඇසුරෙන්)
ගයාන් කුමාර වීරසිංහ සහ රක්ෂණ ශ්රියන්ත
