• මෙම තත්ත්වය විශේෂයෙන් ගර්භණී මව්වරුන් සහ කුඩා දරුවන්ගේ අභ්‍යන්තර හෝමෝන සමතුලිතතාවයට බලපෑම් කළ හැකි බරපතල අනතුරු ඇඟවීමකි.සාම්ප්‍රදායික තේ කොළ කොතරම් ආරක්ෂිතද?ප්ලාස්ටික් බෑග් භාවිතයෙන් තොර සාමාන්‍ය තේ කොළවල (Bulk tea) මෙවැනි ඉහළ රසායනික සාන්ද්‍රණයක් දක්නට නොලැබේ.
• සාමාන්‍ය තේ කොළ ග්‍රෑම් 2ක කෝප්පයක අඩංගු වූයේ මයික්‍රොප්ලාස්ටික් අංශු 0.3ත් 2.4ත් අතර ඉතා නොසැලකිය යුතු ප්‍රමාණයකි.කර්මාන්තශාලා යන්ත්‍ර සූත්‍ර, ප්‍රවාහන ඇසුරුම් සහ වායුගෝලීය දූවිලි මගින් එම සුළු අංශු තේ කොළවලට එක්වන බව අධ්‍යයනය පෙන්වා දෙයි.
• Microplastics in Your Morning Cup.

උදෑසන පිබිදීමත් සමඟ උණුසුම් තේ කෝප්පයක රස බලන බොහෝ දෙනෙකු නොදැනුවත්වම දිනපතා ශරීරගත කැර ගන්නේ නොපෙනෙන ප්ලාස්ටික් අංශු බව ජාත්‍යන්තර ආහාර විද්‍යා පර්යේෂකයින් පිරිසක් අනතුරු අඟවයි.
සාම්ප්‍රදායික කඩදාසි හෝ ශාකමය කෙඳි වෙනුවට ඇතැම් වෙළඳනාම භාවිත කරන ප්ලාස්ටික් දැල් සහිත ටී බෑග් (Plastic mesh tea bags) උණු වතුරේදී ක්ෂුද්‍ර අංශු බවට කැඩී යෑම මීට මූලික හේතුවයි. විද්‍යා ක්ෂේත්‍රයේ ප්‍රමුඛ සඟරාවක් වන npj Science of Food හි පළවූ වාර්තාවකට අනුව, මෙම දැල් ආශ්‍රයෙන් පිළිකා කාරක හා හෝමෝන අසමතුලිතතා ඇති කරන රසායනික සංයෝග රැසක් මුදාහැරේ.

ක්ෂුද්‍ර අංශු දහස් ගණනක් උණු වතුරට
පර්යේෂකයින් තුර්කියේ වෙළෙඳ පොළෙන් ලබාගත් ප්ලාස්ටික් ටී බෑග් වර්ග සෙල්සියස් අංශක 95ක පමණ උණුසුම් ජලයේ විනාඩි තුනක් තබා නිරීක්ෂණය කැර තිබේ. එහිදී එක් තේ කෝප්පයකට ක්ෂුද්‍ර ප්ලාස්ටික් අංශු 555 සිට 2,498 දක්වා ප්‍රමාණයක් නිකුත් වන බව හඳුනා ගැනිණි.
මෙහිදී තක්සේරු කැර ඇත්තේ මයික්‍රෝමීටර් 100ට වඩා විශාල අංශු පමණක් වන අතර, ඊටත් වඩා කුඩා අංශු සැළකිල්ලට ගතහොත් මේ සංඛ්‍යාව මීට වඩා බෙහෙවින් ඉහළ යා හැකි බව විද්‍යාඥයින්ගේ නිගමනයයි.

හෝමෝන ක්‍රියාකාරිත්වයට එල්ලවන තර්ජනය
ප්ලාස්ටික් කෙඳිවලට අමතරව, ඒවා නම්‍යශීලී කිරීම සඳහා නිෂ්පාදන ක්‍රියාවලියේදී එක්කරන BPA (Bisphenol A) සහ තවත් ප්ලාස්ටිසයිසර් වර්ග කිහිපයක්ම තේ වතුරට එකතු වන බව තහවුරු වී තිබේ.
යුරෝපීය ආහාර සුරක්ෂිතතා අධිකාරිය (EFSA) නිර්දේශ කරන දෛනික උපරිම BPA සීමාවෙන් 4.55% සිට 21.70% දක්වා ප්‍රමාණයක් එකම ප්ලාස්ටික් ටී බෑග් කෝප්පයකින්ම ශරීරයට උරාගත හැක. මෙම තත්ත්වය විශේෂයෙන් ගර්භණී මව්වරුන් සහ කුඩා දරුවන්ගේ අභ්‍යන්තර හෝමෝන සමතුලිතතාවයට බලපෑම් කළ හැකි බරපතළ අනතුරු ඇඟවීමකි.

සාම්ප්‍රදායික තේ කොළ කොතරම් ආරක්ෂිතද?
ප්ලාස්ටික් බෑග් භාවිතයෙන් තොර සාමාන්‍ය තේ කොළවල (Bulk tea) මෙවැනි ඉහළ රසායනික සාන්ද්‍රණයක් දක්නට නොලැබේ. සාමාන්‍ය තේ කොළ ග්‍රෑම් 2ක කෝප්පයක අඩංගු වූයේ මයික්‍රොප්ලාස්ටික් අංශු 0.3ත් 2.4ත් අතර ඉතා නොසැලකිය යුතු ප්‍රමාණයකි.
කර්මාන්තශාලා යන්ත්‍ර සූත්‍ර, ප්‍රවාහන ඇසුරුම් සහ වායුගෝලීය දූවිලි මඟින් එම සුළු අංශු තේ කොළවලට එක්වන බව අධ්‍යයනය පෙන්වා දෙයි. මේ නිසා තේ පෙරීමට පෙර සාමාන්‍ය ඇල්වතුරෙන් තේ කොළ මදක් සෝදා හැරීමෙන් පරිසරයෙන් එක්වන දූවිලි ඉවත් කරගත හැකි බව පර්යේෂකයෝ පෙන්වා දෙති.

දෛනික භාවිතයට සරල විසඳුමක්
* නූතන පහසුව තකා වෙළෙඳපොළට පැමිණ ඇති ප්ලාස්ටික් දැල් සහිත ටී බෑග්වලින් සම්පූර්ණයෙන්ම වැළකී සිටීම සෞඛ්‍යාරක්ෂිත බව විද්‍යාඥයන්ගේ උපදෙසයි.

* ප්ලාස්ටික් දැල් සහිත පැකට්ටු වෙනුවට සාමාන්‍ය වියළි තේ කොළ භාවිත කරන්න.

* තේ පෙරා ගැනීම සඳහා මැටි, වීදුරු හෝ මල නොබැඳෙන වානේ (Stainless steel) පෙරහන් පමණක් තෝරාගන්න.

* කඩදාසිවලින් සාදන ලද සාම්ප්‍රදායික ටී බෑග් භාවිත කරන්නේ නම් ඒවායේ ප්ලාස්ටික් අලේපන නොමැති බව තහවුරු කරගන්න.

උපුටා ගැනීම – The Leader

විශ්වාසනීය මූලාශ්‍ර:

Medical Xpress විද්‍යා පර්යේෂණ වාර්තාව: Plastic tea bags are releasing BPA, plasticizers and microplastics

Nature – npj Science of Food නිල අධ්‍යයන ප්‍රකාශනය

YouTube වීඩියෝ විමර්ශනය: Are Tea Bags Toxic? Microplastics in Your Morning Cup