ආරක්ෂක ප්රධානී අලි ලරිජානි සහ ඉහළ හමුදා නිලධාරියකු ඝාතනය කිරීමට පළිගැනීමක් ලෙස ඉරාන හමුදාවෙන් ඊශ්රායලයේ ටෙල්අවීව් නගරයට දැවැන්ත මිසයිල ප්රහාරයක් එල්ල කැර ඇත.
එම ප්රහාරය පෙරේදා(17) රාත්රියේ සිට අඛණ්ඩව එල්ල වූ බවත්, පොකුරු මිසයිල ප්රහාර දෙකක් ද එල්ල කැර ඇති බව අනාවරණය වෙයි.
නිවේදනයක් නිකුත් කරමින් ඉරාන ආරක්ෂක හමුදාව ප්රකාශ කැර ඇත්තේ, ටෙල් අවීව් නගරයට පහර දීමට කොරොම්ෂාර් සහ කඩාර් වර්ගයේ මිසයිල ද භාවිත කළ බවයි. ඉරාන මිසයිල ප්රහාරවලින් ටෙල් අවීව් නගරයේ ජනාකීර්ණ ස්ථාන රැසකට හානි සිදුවී ඇති අතර, පුද්ගලයන් දෙදෙනකු ජීවිතක්ෂයට පත්වූ බව ඊශ්රායල බලධාරින් ප්රකාශ කැර තිබේ. ඒ අනුව ඉරාන ප්රහාරවලින් ඊශ්රායලයේ මියගිය පුද්ගලයන්ගේ සංඛ්යාව 15 දක්වා ඉහළ ගිය බව ද වාර්තා වේ.
ගුවනේදී කුඩා වර්ගයේ බෝම්බ විසිරුවා හරින පොකුරු මිසයිල දෙකක් ද ඉරානයෙන් එල්ල කැර ඇති අතර, ටෙල්අවීව් නගරයේ හමුදා යටිතල පහසුකම් ඇතුළු ගොඩනැඟිලි රැසක් විනාශ වී ඇතැයි ද සඳහාන් වේ. මධ්යම ඊශ්රායලයේ පෙටා ටික්වා සහ හරීඩ් නගරවලට ද මිසයිල ප්රහාර එල්ල වී ඇති අතර, ටෙල් අවීව් නුවර සැවිඩෝර් ප්රදේශයේ දුම්රිය ස්ථානයකට හානි සිදුවීමෙන් රට පුරා දුම්රිය ගමන් තාවකාලිකව අත්හිටුවීමට පියවර ගත් බව ඊශ්රායල දුම්රිය සේවය නිවේදනය කැර ඇත ඊයේ උදෑසනින් අවසන් වූ පැය 24 ඇතුළත ඉරාන සහ හෙස්බුල්ලා ප්රහාරවලින් පුද්ගලයන් 192 දෙනකු තුවාල ලැබූ බව ඊශ්රායලයේ සෞඛ්ය අමාත්යාංශය සඳහන් කැර ඇති අතර, යුද ගැටුම් ආරම්භ වීමෙන් පසු ඊයේ දක්වා තුවාල ලැබූ පිරිස 3,727 දක්වා ඉහළ ගිය බව ද සඳහන්ය.
