රුසියානු – යුක්‍රේන යුද්ධය නිමා කිරීමේ අරමුණින් අමෙරිකානු ජනාධිපති ඩොනල්ඩ් ට්‍රම්ප්ගේ පරිපාලනය දියත් කළ නවතම රාජ්‍ය තාන්ත්‍රික මෙහෙයුම යටතේ දෙපාර්ශ්වය අතර ත්‍රෛපාර්ශ්වික සාකච්ඡා වටයක් කඩිනමින් ඇරඹීමේ සූදානමක් පවතින බව වාර්තා වේ.

අමෙරිකානු විශේෂ සාම නියෝජිත ස්ටීව් විකොෆ් සහ ජනාධිපති ට්‍රම්ප්ගේ බෑණනුවන් වන ජෙරඩ් කුෂ්නර් මොස්කව් නුවරදී රුසියානු ජනාධිපති ව්ලැදිමීර් පුටින් සමඟ පැය තුනක සාකච්ඡාවක් පැවැත්වීමෙන් අනතුරුව ඉරිදා කියෙව් නුවරට පැමිණ යුක්‍රේන ජනාධිපති වොලොදිමිර් සෙලෙන්ස්කි හමුවී දීර්ඝ සාකච්ඡාවක නිරත වූහ.

අමෙරිකානු සාම නියෝජිතයන් වශයෙන් ඔවුන් දෙදෙනා කියෙව් අගනුවර සංචාරයක නිරත වූ ප්‍රථම අවස්ථාව මෙය වීම විශේෂත්වයකි.

කියෙව් සාකච්ඡා සහ ආරක්ෂක සහතික

යුක්‍රේන ජනාධිපතිවරයා සමඟ පැවති මෙම හමුව අතිශය ඵලදායී මෙන්ම ගැඹුරු එකක් වූ බව අමෙරිකානු නියෝජිතයෝ සඳහන් කළහ. මොස්කව්හිදී නව අදහස් කිහිපයක් ඉදිරිපත් වූ බවත්, ඒ අනුව යුක්‍රේනය, රුසියාව සහ අමෙරිකාව අතර නව සාම සාකච්ඡා වටයක් කඩිනමින් ප්‍රකාශයට පත් කිරීමට බලාපොරොත්තු වන බවත් නියෝජිත ස්ටීව් විකොෆ් පැවසීය.

අමෙරිකාව මූලිකත්වය ගන්නා ත්‍රෛපාර්ශ්වික සාකච්ඡා සඳහා කියෙව් පාලනය සූදානම් බව ප්‍රකාශ කළ ජනාධිපති සෙලෙන්ස්කි, ඉදිරියේ පැමිණෙ ශීත සෘතුවේදී රුසියානු හමුදාවෙන් එල්ල විය හැකි ප්‍රහාර ගැනත් , බලශක්ති පද්ධති ආරක්ෂා කර ගැනීම සහ ගුවන් ආරක්ෂක පද්ධති සපයා ගැනීම පිළිබඳවත්  මෙහිදී අවධානය යොමු කළ බව සඳහන් කෙළේය. එමෙන්ම යුද්ධයෙන් පසු යුක්‍රේනයේ ආර්ථික පුනර්ජීවනය සහ රටේ ස්වෛරීභාවය සුරැකෙන ආකාරයේ ආරක්ෂක සහතික සම්බන්ධයෙන් ද පාර්ශ්වයන් අතර සාකච්ඡා සිදුව තිබේ. බ්‍රිතාන්‍ය, ප්‍රංශ සහ ජර්මානු ජාතික ආරක්ෂක උපදේශකයින් ද මෙම සාකච්ඡාවල අවසන් අදියරට එක්ව සිටි බව සඳහාන් වෙයි.

දොන්බාස් අර්බුදය සහ ගොඩබිම් සටන්

සාම සාකච්ඡා කෙරෙහි යම් සුබවාදී බලාපොරොත්තුවක් මතුව තිබුණද, නැඟෙනහිර යුක්‍රේනයේ දොන්බාස් කලාපයේ පාලනය සම්බන්ධයෙන් දෙපාර්ශ්වය තවමත් එකඟතාවකට පැමිණ නොමැත. දැනට යුක්‍රේනය යටතේ පවතින නගර කිහිපයකින් හමුදා ඉවත් කරගන්නා ලෙස මොස්කව් පාලනය දිගින් දිගටම බලපෑම් කළ ද, කියෙව් රජය එම ඉල්ලීම තරයේ ප්‍රතික්ෂේප කරමින් සිටින බව වාර්තා වෙයි.

“දොන්බාස් කලාපය පිළිබඳ ප්‍රශ්නය තමයි මේ යුද්ධයේ තීරණාත්මකම කාරණය,” යනුවෙන් මාධ්‍ය අමතමින් ජනාධිපති සෙලෙන්ස්කි අවධාරණය කෙළේය.

මේ අතර, සාකච්ඡා පැවැත්වෙන කාලසීමාව තුළ කියෙව් සහ මොස්කව් අගනුවරවල් ඉලක්ක කැර ගනිමින් සිදුකෙරෙන දිගුදුර ගුවන් ප්‍රහාර තාවකාලිකව නතර කිරීමට දෙපාර්ශ්වයම පියවර ගෙන තිබේ. කෙසේ වෙතත්, කිලෝමීටර් 1,200ක් පමණ වන ප්‍රධාන පෙරමුණේ ගොඩබිම් ගැටුම් තවදුරටත් ක්‍රියාත්මක වන අතර, රුසියාවේ රියාසාන් (Ryazan) තෙල් පිරිපහදුව වෙත යුක්‍රේනය විසින් ඩ්‍රෝන ප්‍රහාරයක් එල්ල කැර ඇති බවට ද තොරතුරු වාර්තා වේ.

සාම සාකච්ඡාවල මීළඟ ක්‍රියාමාර්ග ඉදිරි සති කිහිපය තුළ නිවේදනය කිරීමට නියමිත බව ධවල මන්දිර ආරංචි මාර්ග තහවුරු කරයි.

වැඩිදුර කියවීම සඳහා මුලාශ්‍ර :

Reuters: US envoys hope for new Ukraine-Russia talks soon after visits to both capitals