රාජ්‍ය අරමුදල් රුපියල් මිලියන 16.6 ක් අවභාවිත කිරීම සම්බන්ධයෙන් හිටපු ජනාධිපති ආර්යා මහාචාර්ය මෛත්‍රී වික්‍රමසිංහට එරෙහිව චෝදනා ගොනු නොකිරීමට අපරාධ පරීක්ෂණ දෙපාර්තමේන්තුව (CID) තීරණය කැර ඇති බවත්, ඇයට එරෙහිව නඩුවක් පැවරීමට ප්‍රමාණවත් සාක්ෂි නොමැති බව නීතිපතිවරයා පවසා ඇතියි සන්ඩේ ටයිම්ස් වාර්තා කර තිබේ.

මහාචාර්ය වික්‍රමසිංහට ගෞරවනීය මහාචාර්ය ධුරයක් පිරිනමන ලද වුල්වර්හැම්ප්ටන් විශ්වවිද්‍යාලයේ උපාධි ප්‍රදානෝත්සවයකට සහභාගී වීම සඳහා ඇයගේ සැමියා වන හිටපු ජනාධිපති රනිල් වික්‍රමසිංහ බ්‍රිතාන්‍යයේ කළ සංචාරයකට මුදල් යෙදවීම සඳහා අදාළ අරමුදල් භාවිතා කැර ඇත.

පොදු දේපොළ පනත යටතේ අපරාධ අවභාවිත චෝදනා මත හිටපු ජනාධිපති වික්‍රමසිංහ සහ හිටපු ජනාධිපති ලේකම් සමන් ඒකනායක යන අයට එරෙහිව අධිචෝදනා ගොනු කිරීමේ හැකියාව CID දැන් ගවේෂණය කරමින් සිටී.

සන්ඩේ ටයිම්ස් වාර්තා කරන්නේ මෙම කාරණය සම්බන්ධයෙන් CID නීතිපතිවරයාගේ උපදෙස් ලබා ගැනීමට අදහස් කරන බවයි.

නඩුව ජුනි 8 වැනි දින කොළඹ කොටුව මහේස්ත්‍රාත් අධිකරණයේදී නැවත කැඳවීමට නියමිතය.

RTI ඉල්ලීමට ප්‍රතිචාරයක් නොමැත.

ජනාධිපතිවරයාගේ සංචාරය පිළිබඳ විමර්ශනයේ කොටසක් ලෙස ලන්ඩනයට ගිය CID නිලධාරීන් විසින් දරන ලද වියදම් පිළිබඳ විස්තර ඉල්ලා මාධ්‍යවේදී තිළිණි රණසිංහ ජනවාරි 08 වැනි දින තොරතුරු දැනගැනීමේ අයිතිවාසිකම් පනත යටතේ ඉල්ලීමක් ගොනු කර මාස පහකට වැඩි කාලයක් ගත වී ඇත.

ඉල්ලීම පසුදා අපරාධ විමර්ශන සහ මූල්‍ය අපරාධ විමර්ශන ඒකකයේ ජ්‍යෙෂ්ඨ නියෝජ්‍ය පොලිස්පතිවරයා වෙත යොමු කරන ලද නමුත්, CID තවමත් තොරතුරු ලබා දී නොමැත.

පසුව ජනවාරි 29 වැනි දින පොලිස්පතිවරයා වෙත අභියාචනයක් ඉදිරිපත් කරන ලදී.

තොරතුරු දැනගැනීමේ අයිතිවාසිකම් පනත යටතේ, රාජ්‍ය බලධාරීන් එවැනි ඉල්ලීම් සඳහා දින 14ක් ඇතුළත ප්‍රතිචාර දැක්විය යුතුය.

විපක්ෂයේ ජ්‍යෙෂ්ඨ දේශපාලන චරිතයක් පැවසුවේ CID හි ලන්ඩන් වියදම්, හිටපු ජනාධිපතිවරයාගේ සංචාරය සඳහා නුසුදුසු ලෙස වියදම් කළ බවට හඳුනාගෙන ඇති මුදලට සමාන බවයි.