පාස්කු ඉරිදා ප්‍රහාරයට අදාළ නඩුවේ සිව්වන දිනයේදී විත්ති පාර්ශ්වයේ ප්‍රකාශ අවසන් විය.

මහාධිකරණ නඩු විභාගයේදී චෝදනා 23,270 ක් සම්බන්ධයෙන් පුද්ගලයින් 24 දෙනෙකුට අධිචෝදනා ගොනු කැර ඇත.

එක් චූදිතයකු ජීවතුන් අතර නොමැති අතර, නිහඬව සිටීමට තීරණය කළ එක් චූදිතයකු හැර අනෙක් සියල්ලන්ම තම විත්ති ප්‍රකාශ ලබා දුන්හ.

ඉන්පසු, අධිකරණය විසින් මුළු සාක්ෂිකරුවන් 35 දෙනාගෙන් CID හි ස්ථානාධිපතිවරයා, අධිකරණ වෛද්‍ය නිලධාරීවරයා සහ තවත් කිහිප දෙනෙකුට හෙට සහ අගෝස්තු 24 වැනි දින පෙනී සිටින ලෙස නොතීසි නිකුත් කරන ලදී.

පස්වැනි විත්තිකරු විසින් සාක්ෂිකරුවකු ලෙස නම් කරන ලද හිටපු පොලිස්පති පූජිත් ජයසුන්දර සාක්ෂි දීමට කැඳවන්නේ නැති බව විත්ති පාර්ශ්වය අධිකරණයට දැනුම් දුන්නේය.

පැමිණිලිකරු විසින් සාක්ෂිකරුවන් 2,309 දෙනෙකු නම් කැර ඇති අතර, ලිඛිත හා වාචික කරුණු දැක්වීම් අවසන් වූ පසු තීන්දුව අපේක්ෂා කෙරේ.