මාස 9ක රැඳවුම් භාරයෙන් පසු අධිකරණයට ඉදිරිපත් කෙරේ: CCTV දර්ශන සංසන්දනයට රස පරීක්ෂක වෙත යැවීමට අවසර
සැකකාරියගේ පලායාමේ ගමන්මඟ, මුදල් හුවමාරු සහ ආයුධ සැපයීම ගැන පොලීසියෙන් විශේෂ වාර්තාවක්
අධිකරණ නියෝගය සහ රඳවා තබා ගැනීමේ පසුබිම
ගණේමුල්ල සංජීව නමැත්තා ඝාතනය කිරීමේ සැලසුමේ ප්රධාන මහමොළකාරිය ලෙස සැලකෙන ඉෂාරා සෙව්වන්දි නමැති සැකකාරිය ලබන 21 වැනි දා දක්වා රක්ෂිත බන්ධනාගාරගත කිරීමට කොළඹ අතිරේක මහේස්ත්රාත් ලියන් වරුෂවිතාන පසුගිය දා නියෝග කළේය.
නේපාලයේදී අත්අඩංගුවට ගැනීමෙන් අනතුරුව 2025 ඔක්තෝබර් මාසයේ සිට මාස 09ක කාලයක් කොළඹ අපරාධ කොට්ඨාසය (CCD) භාරයේ රඳවා තබාගෙන ප්රශ්න කරන ලද සැකකාරිය, අදාළ රැඳවුම් නියෝග කාලය අවසන් වීමෙන් පසු අධිකරණයට ඉදිරිපත් කළ අවස්ථාවේදී මෙම නියෝගය නිකුත් කෙරිණි.
ඉෂාරා සෙව්වන්දි නඩුවේ විමර්ශන සංග්රහය
| ප්රධාන චෝදනාව: ගණේමුල්ල සංජීව ඝාතන කුමන්ත්රණයේ ප්රධාන සංවිධායක ලෙස කටයුතු කිරීම
| අත්අඩංගුවට ගැනීම සහ රඳවා ගැනීම: නේපාලයේදී අත්අඩංගුවට ගෙන 2025 ඔක්තෝබර් සිට මාස 09ක් CCD රඳවා තබාගැනීම
| පලායාමේ ගමන්මඟ: කොළඹ ප්රධාන මහේස්ත්රාත් අධිකරණ පරිශ්රය –> මතුගම වැලිපැන්න –> මිද්දෙණිය –> යාපනය –> නේපාලය
| අධිකරණ අනුමැතිය: CCTV දර්ශන සංසන්දනය සඳහා සැකකාරිය රජයේ රස පරීක්ෂකවරයා වෙත යොමුකර මුහුණු පරීක්ෂාවක් සිදු කිරීම
| ඉදිරි අධිකරණ වාරය: සැකකාරිය ලබන 21 වැනි දින දක්වා රක්ෂිත බන්ධනාගාරගත කිරීම
පොලිස් වාර්තාව සහ පලායාමේ තොරතුරු
කොළඹ අපරාධ කොට්ඨාසයේ නිලධාරීන් විසින් සිද්ධියට අදාළ සාක්ෂි සහ පරිවේෂණීය සාක්ෂි සම්පිණ්ඩනය කැර සකස් කරන ලද විශේෂ වැඩිදුර වාර්තාවක් අධිකරණය හමුවට ඉදිරිපත් කරන ලදී.
එම වාර්තාව මගින් ඝාතන සැලසුම ක්රියාත්මක කළ ආකාරය, ඊට සම්බන්ධ සෙසු සැකකරුවන් සමඟ සිදුකළ ගනුදෙනු, මුදල් හුවමාරු වූ ආකාරය සහ අදාළ ගිනිඅවි සැපයූ ආකාරය පිළිබඳ තොරතුරු දක්වා තිබුණි. එමෙන්ම ඝාතනය සිදුවූ දින සැකකාරිය කොළඹ ප්රධාන මහේස්ත්රාත් අධිකරණ පරිශ්රයට පැමිණි ආකාරය, ඉන් අනතුරුව මතුගම වැලිපැන්න හරහා මිද්දෙණියටත්, එතැන් සිට යාපනය දක්වා ගමන් කැර විදේශගත වූ ආකාරයත් පොලීසිය විසින් අධිකරණයට කරුණු වාර්තා කෙළේය.
රස පරීක්ෂක පරීක්ෂණය සහ CCTV සංසන්දනය
විමර්ශන කටයුතු තවදුරටත් සිදුකෙරෙන බැවින්, සිද්ධිය වූ ස්ථානය ආශ්රිතව ලබාගෙන ඇති CCTV දර්ශනවල සිටින කාන්තාවගේ රූපරාමු සහ සැකකාරියගේ මුහුණුවර සංසන්දනය කැර තහවුරු කැරගැනීම සඳහා විශේෂ මුහුණු පරීක්ෂාවක් (Facial Recognition/Comparison) සිදුකිරීමේ අවශ්යතාව පොලීසිය පෙන්වා දුන්නේය.
ඊට අවසර දුන් මහේස්ත්රාත්වරයා, සැකකාරිය රජයේ රස පරීක්ෂකවරයා වෙත යොමු කැර අදාළ පරික්ෂණය සිදුකිරීමට පියවර ගන්නා ලෙස නියෝග කළේය. ඒ අනුව ලබන 17 වන දින සැකකාරිය රජයේ රස පරීක්ෂකවරයා හමුවට යොමු කිරීමට නියමිතය.
බන්ධනාගාර ආරක්ෂාව සහ මාංචු සම්බන්ධයෙන් කැබිනට් ප්රකාශකගේ පැහැදිලි කිරීම
මේ අතර, සැකකාරිය අධිකරණයට ඉදිරිපත් කළ අවස්ථාවේ ඇයට මාංචු දමා නොසිටීම සම්බන්ධයෙන් අද (11) පැවැති කැබිනට් තීරණ දැනුම්දීමේ මාධ්ය හමුවේදී මාධ්යවේදීන් නැඟූ ප්රශ්නයකට පිළිතුරු දෙමින් කැබිනට් මාධ්ය ප්රකාශක, ඇමැති වෛද්ය නලින්ද ජයතිස්ස සඳහන් කෙළේ, සැකකරුවන් අධිකරණය වෙත රැගෙන යෑමේදී සහ අධිකරණ භූමිය තුළදී ආරක්ෂක පියවරයන් අනුගමනය කිරීම සම්බන්ධයෙන් බන්ධනාගාර දෙපාර්තමේන්තුවට සහ පොලීසියට නිශ්චිත ආයතනික මාර්ගෝපදේශ පවතින බවයි.
එවැනි පටිපාටීන් ක්රියාත්මක කිරීමේදී පවතින නීතිමය සහ ආරක්ෂක ප්රතිපාදන අදාළ බලධාරීන් විසින් පාලනය කරනු ලබන බවද අමාත්යවරයා වැඩිදුරටත් පැහැදිලි කෙළේය.(Source- The Leader)
