කොළඹ කොටස් වෙළඳපොළේ සියලු කොටස් මිල දර්ශකයන් (ASPI) ඊයේ (09) ඒකක 291.72 කින් ඉහළ යමින් දවස අවසානයේ

 සාර්ථක ගනුදෙනු කළ දිනයක්  විය.  

කොළඹ කොටස් මිල දර්ශකය ඒකක 21,531.37 ක් ලෙස සටහන් වූ අතර, වෙළඳපොළේ සමස්ත දෛනික පිරිවැටුම රුපියල් බිලියන 3.33 ක් දක්වා ඉහළ ගොස් ඇත.

පසුගිය දින කිහිපය තුළ යම් උච්චාවචනයන් දක්නට ලැබුණ ද, මෙම වර්ධනය ආයෝජකයින් අතර යළිත් ධනාත්මක විශ්වාසයක් ගොඩනැඟෙන බවට පැහැදිලි සංඥාවක් බව වෙළඳපොළ විශ්ලේෂකයෝ පෙන්වා දෙති.

දෛනික පිරිවැටුම රුපියල් බිලියන 3.33 සීමාවට පැමිණීමෙන් ගනුදෙනුවල සක්‍රියතාව යළි තහවුරු වී ඇති බව මූල්‍ය දත්ත මඟින් තහවුරු වේ.

ප්‍රමුඛ බැංකු හා ක්ෂේත්‍ර කිහිපයක පිබිදීමක්

කොමර්ෂල් බැංකුව (Commercial Bank) සහ හැටන් නැෂනල් බැංකුව (Hatton National Bank) වැනි ප්‍රමුඛ බැංකු කොටස්වල මිල ගණන් ඉහළ යෑම වෙළෙඳපොළේ සමස්ත ඉදිරි ගමනට විශාල ශක්තියක් විය.

මීට අමතරව ප්‍රාග්ධන භාණ්ඩ ක්ෂේත්‍රයේ කොටස් සක්‍රිය ලෙස ගනුදෙනු වීම මෙන්ම ආහාර, පාන වර්ග හා දුම්කොළ ක්ෂේත්‍රයේ කොටස් මිල ඉහළ යෑම ද ASPI දර්ශකයේ වර්ධනය කෙරෙහි සෘජුව බලපෑවේය.

වෙළෙඳපොළ පිරිවැටුම රුපියල් බිලියන 3.33 දක්වා ඉහළ යෑමෙන් පෙනී යන්නේ ගනුදෙනු කිරීමේ උනන්දුව යළි පණ ලැබ ඇති බවයි. මේ සඳහා දේශීය ආයෝජකයන්ගේ ක්‍රියාකාරී සහභාගීත්වය ප්‍රබල දායකත්වයක් ලබා දී තිබේ.

අඛණ්ඩව ඉදිරියට යන ධනාත්මක ප්‍රවණතාව

පසුගිය සතියේදී ද සියලු කොටස් මිල දර්ශකය (ASPI) සහ S&P SL20 දර්ශකය යන ද්විත්වයම සියයට 5 කට වැඩි අගයකින් ඉහළ ගිය අතර, එහිදී සාමාන්‍ය දෛනික පිරිවැටුම වාර්තා වූයේ රුපියල් බිලියන 3.0 ක් පමණ වශයෙනි. ඊයේ දිනයේ සටහන් වූ රුපියල් බිලියන 3.33 ක පිරිවැටුමෙන් තහවුරු වන්නේ එම ධනාත්මක ආයෝජන රටාව බිඳ නොවැටී අඛණ්ඩව ඉදිරියට ඇදී යන බවයි.

විදේශීය ආයෝජකයින්ගේ ක්‍රියාකාරකම් පිළිබඳ සම්පූර්ණ තොරතුරු මෙතෙක් ලැබී නොමැති වුවද, ඉදිරි දිනවලදී ඔවුන් දක්වන දායකත්වය වෙළෙඳපොළේ දිශානතිය තීරණය කිරීමෙහිලා තීරණාත්මක සාධකයක් වනු ඇතැයි අපේක්ෂා කෙරේ.

කොළඹ කොටස් වෙළඳපොළ නිල වෙබ් අඩවිය ඇසුරෙන්