ගණේමුල්ල සංජීව ඝාතනය සම්බන්ධයෙන් දැනට රිමාන්ඩ් භාරයේ සිටින ඉෂාරා සෙව්වන්දිගේ DNA සාම්පල සහ ඡායාරූප විශ්ලේෂණය සඳහා යවා ඇති අතර, එහි ප්රතිඵල වාර්තා ඊයේ (21) අපරාධ පරීක්ෂණ දෙපාර්තමේන්තුව (CID) කොළඹ ප්රධාන මහේස්ත්රාත් අසංග එස්. බෝදරගම වෙත ඉදිරිපත් කැර ඇත.
කොළඹ මහේස්ත්රාත් අධිකරණයේදී සංජීවට වෙඩි තබා ඝාතනය කිරීම සම්බන්ධයෙන් සෙව්වන්දි සහ අනෙකුත් සැකකරුවන් සැප්තැම්බර් 4 වැනි දින දක්වා නැවත රක්ෂිත බන්ධනාගාර ගත කරන ලෙස මහේස්ත්රාත්වරයා නියෝග කෙළේය.
අධිකරණයට වැඩිදුර කරුණු ඉදිරිපත් කරමින් කොළඹ අපරාධ කොට්ඨාශය (CCD) පැවසුවේ, 2026 අගෝස්තු 17 වැනි දින මුහුණේ පරීක්ෂණය සඳහා සැකකරු රජයේ රස පරීක්ෂකවරයා වෙත යොමු කැර ඇති බවත්, එම අවස්ථාවේදී DNA සාම්පල, ඡායාරූප සහ වීඩියෝ දර්ශන රැස් කරන ලද බවත්ය.
තිස් දෙවැනි සැකකරු වන බටුවත්තේ චාමර සහ ගම්පහ ඔස්මාන් සඳහා කලින් නිකුත් කරන ලද රැඳවුම් නියෝග අගෝස්තු 13 වැනි දින කල් ඉකුත් වී ඇති බවත්, එමඟින් විමර්ශකයින් දෙදෙනාටම දින 90 ක රැඳවුම් නියෝගයක් ලබා ගැනීමට හේතු වූ බවත් අධිකරණයට දන්වන ලදී.
පහළොස් වැනි සැකකරු වන ඉෂාර සෙව්වන්දිට යාපනය හරහා මන්නාරමට පලා යාමට උදව් කළ බවට චෝදනා එල්ල වන හතළිස් එක්වැනි සහ හතළිස් දෙවැනි සැකකරුවන් සම්බන්ධයෙන් වැඩිදුර පරීක්ෂණ සිදු කැර ඇති බව CCD පැවසීය. එතැන් සිට දෙදෙනාම අත්අඩංගුවට ගෙන විධිමත් රැඳවුම් නියෝග යටතේ රඳවා තබා ඇත.
ඊට අමතරව, රතු නිවේදන හරහා ඕමානයේදී අත්අඩංගුවට ගත් මට්ටක්කුලියේ චතු නමින් හැඳින්වෙන සැකකරුවකු දින අනූවක රැඳවුම් නියෝගයක් යටතේ අත්අඩංගුවේ පසුවේ.
ඔහුගෙන් ලබාගත් ප්රකාශයකට අනුව, ඔහු ගනේමුල්ල සංජීව ඝාතනයට දිනකට පෙර 2025 පෙබරවාරි 17 වැනි දින ඉෂාර සෙව්වන්දි සමඟ කොළඹ ප්රධාන මහේස්ත්රාත් අධිකරණයට ගොස් ඔත්තු බැලීම සිදු කැර ඇත.
මෙම ඔත්තු බැලීමේ සංචාරය සඳහා කෙහෙල්බද්දර පද්මේ විසින් සපයන ලද මුදල් වලින් අරමුදල් සපයා ඇති බව CCD අධිකරණයට පැවසීය.
රජයේ රස පරීක්ෂකවරයාගේ වාර්තා මඟින් ද තහවුරු කැර ඇත්තේ අපරාධය පහසු කිරීම සඳහා විසිඅට වැනි සැකකරු වන නීතිඥ තමරා කුමාරි විසින් සකස් කරන ලද බව කියන ව්යාජ හැඳුනුම්පත් භාවිතා කැර ඇති බවයි.
විසිනව වැනි සැකකරු සම්බන්ධයෙන් අධිකරණයට ඉදිරිපත් කිරීම සඳහා සාක්ෂි සාරාංශ වාර්තාවක් මේ වන විට සකස් කරමින් පවතින බවත්, ඔහු අත්අඩංගුවට ගැනීමේ උත්සාහයන් අඛණ්ඩව සිදුවන බවත් CCD වැඩිදුරටත් පැවසීය.
ඉදිරිපත් කරන ලද කරුණු සලකා බැලූ මහේස්ත්රාත්වරයා අතිරේක වාර්තාවක් ඉදිරිපත් කරන ලෙස නියෝග කැර සැකකරුවන් තවදුරටත් රක්ෂිත බන්ධනාගාරගත කෙළේය.
සැකකරුවන් තිදෙනෙකු පෞද්ගලිකව අධිකරණය හමුවේ පෙනී සිටි අතර, ඉතිරි අය බන්ධනාගාරයේ සිට සූම් හරහා නඩු කටයුතුවලට සම්බන්ධ වූහ.
