ශ්රී ලංකා රජය විසින් ඔස්ට්රේලියානු රජයට ගෙවිය යුතු ණය වාරික මුදලක් වූ අමෙරිකානු ඩොලර් මිලියන 2.5ක මුදලක් වෙනත් ගිණුමකට බැර කිරීමේ සිද්ධිය පිළිබඳව ”ෆ්රී ලෝයර්ස්” සංවිධානය හෙළිදරව්කර අද වන විට දින පහක් (5) ගතවී ඇත.
මෙම සිද්ධිය සම්බන්ධයෙන් මේ දක්වා අවම වශයෙන් විමර්ශකයින් මහේස්ත්රාත් අධිකරණයකට ‘කරුණු වාර්තා කිරීමක්’ හෝ සිදු කැර නැති බවත් වැඩ තහනමට ලක්වී ඇති නිලධාරීන්ගේ සාක්ෂි සටහන් කිරීමක් හෝ විමර්ශකයින් සිදු කර නැති බවත් ”ෆ්රී ලෝයර්ස්” සංවිධානය පවසයි.
එවැනි පසුබිමක, එම සංවිධානය මේ සිද්ධිය පිළිබඳ ජනාධිපතිට සහ කැබිනට් මණ්ඩලයට විවෘත ප්රශ්න 22 ක් යොමු කැර ඇත.
එම සංවිධානයේ කැඳවුම් කරුවන් වන ජනාධිපති නීතිඥ මෛත්රී ගුණරත්න සහ නීතිඥ අතුල ද සිල්වා ගේ අත්සනින් යුතුව ඊයේ (27) නිකුත්කර ඇති නිවේදනයක සඳහන් පරිදි, මහජන සුබසෙත උදෙසා කටයුතු කරන නීතිඥවරුන් ඇතුළු වෘත්තිකයින්ගේ එකමුතුවක් වන ‘ෆ්රී ලෝයර්ස්’ සංවිධානය අවධාරණය කරන්නේ ජනාධිපතිවරයා සහ කැබිනට් මණ්ඩල මෙම ප්රශ්න 22 ට විවෘත පිළිතුරු ලබාදිය යුතු බවයි.
එම ප්රශ්න 22 මෙසේය.
1. ජනරජයේ ජනාධිපතිතුමා, භාණ්ඩාගාරයේ ඩොලර් මි. 2.5 ක් අස්ථානගතවී හෝ මංකොල්ලකෑමකට ලක්වී ඇති බව පිළිගන්නේ ද?
2. මේ සිද්ධිය සිදූවූ දිනය පිළිබඳ ජනාධිපතිවරයා ලෙස ඔබ වෙත කරුණු වාර්තා කර තිබුනේ ද?
3. 2025 සැප්. 6 හෝ ඒ ආසන්න දිනක ඔබතුමන් අමාත්ය ධූරය දරන මුදල් අමාත්යාංශයේ දත්ත පද්ධතියට සයිබර් ප්රහාරයක් එල්ලවී තිබූ බව ජනාධිතිවරයා/මුදල් අමාත්යවරයා ලෙස දැන සිටියේ ද?
4. එම ප්රහාරය එල්ල වූ බව භාණ්ඩාගාර ලේකම් විසින් ඔබතුමන් සහ මුදල් නියෝජ්ය අමාත්යතුමන් දැනුවත් කර තිබුණා ද?
5. එම දැනුමත් කිරිම සිදුව තිබුනේ නම්, ඔබතුමන් මුදල් නියෝජ්ය අමාත්යතුමන් ඒ සම්බන්ධයෙන් ගනු ලැබූ ක්රියාමාර්ග කවරේ ද?
6. ඔබතුමන් ඩිජිටල් කටයුතු, මුදල්, ක්රම සම්පාදනය, ජාතික ආරක්ෂක විෂය සම්බන්ධයෙන් වන අමාත්යවරයා ලෙස මහා භාණ්ඩාගාරයේ සිදු වූ මංකොල්ලය පිළිබඳ වගකීම දැරිය යුතු බව පිළිගන්නේ ද?
7. එසේ නම්, ඔබ ජාතික ආරක්ෂාවේ මුලික විෂය පථයට අයත් අංශ හතරක් මේ වන විට බිඳවැටී ජාතික ආරක්ෂාව අනතුරට පත්ව ඇති බව පිළිගන්නේ ද?
8. ඔබතුමන් භාණ්ඩාගාර ලේකම් ඔබතුමන් විසින් පත් කළ බව පිළිගන්නේ ද?
9. මුදල් ලේකම්වරයා ජනතා විමුක්ති පෙරමුණේ/මාලිමාවේ හිටපු පාර්ලිමේන්තු මන්ත්රීවරයෙකු බව පිළිගන්නේ ද?
10. ඔහුට භාණ්ඩාගාරය හා මුදල් හා ක්රම සම්පාදනය සම්බන්ධයෙන් කිසිදු පුර්ව අත්දැකීමක් නොමැති බව පිළිගන්නේ ද?
11. ඔහු විසින් මේ වන විට මුලික විමර්ශනයට අදාල පත්වීම් හා වාර්තා වෙනස් කරමින් මෙම මංකොල්ලයේ සාක්ෂි විනාශ කරමින් සිටින බව ඔබතුමන් දැන්වත්ව තිබේ ද?
12. මුදල් අමාත්යාංශ ලේකම් පත් කිරීමෙන් පසුව මෙම මංකොල්ලය සිදුවු බවත්, ඉන් පසුව මුල්ය අපරාධයක දී අනුගමනය කළ යුතු මුලික පරිපාලන ව්යවහාරයන් පවා ලේකම්වරයා විසින් පැහැර හැර ඇති බව ඔබතුමන් පිළිගන්නේ ද?
13. මෙම මංකොල්ලකෑම සිදුවූ දිනය හා එයට මහා භාණ්ඩාගාරයෙන් සම්බන්ධ වූ පුද්ගලයින් කවුරුන්ද යන්න ඔබතුමන් දන්නේ ද?
14. මේ සම්බන්ධයෙන් ඔබ විසින් පත් කරනු ලැබූ භාණ්ඩාගාරයේ ලේකම්, ඔබතුමන් දැනුවත් කරනු ලැබූයේ කවදාද?
15. ෆ්රී ලෝයර්ස් සංවිධානය විසින් කථානායකතුමන් දැනුවත් කිරීමට පෙර මේ පිළිබඳ ඔබතුමන් දැනුවත්වූයේ නම්, මේ පිළිබඳ ඔබ ජනරජයේ ආණ්ඩුක්රම ව්යවස්ථාව 148 ව්යවස්ථා ප්රකාරව පාර්ලිමේන්තුවට හෝ ජනතාව දැනුවත් නොකළේ මන්ද?
16. සෑම මසකටම දෙවරක් හෝ එයට වැඩි අවස්ථාව දී පාර්ලිමේන්තුව ඇමතීම සඳහා පැමිණෙන ඔබතුමන් මේ පිළිබඳ පාර්ලිමේන්තුවෙන් කරුණු වසන් කිරීම වරදක් බව පිළිගන්නේ ද?
17. මේ මංකෝල්ලය සම්බන්ධයෙන් ඔබ විසින් පත් කරනු ලැබූ භාණ්ඩාගාර ලේකම්තුමා, අපරාධ පරීක්ෂණ දොපාර්තමේන්තුවට හෝ පොලීසියට හෝ 2026 අප්රේල් 21 දිනට පෙර ( අපගේ හෙළිදරව්වට පෙර) පැමිණිලි කර තිබේ ද?
18. මේ පරිගණක අපරාධය පිළිබඳ පරිගණ අපරාධ හදිසි විමර්ශනය සඳහා ස්ථාපති ආයතන වෙත පැමිණිලි කරනු ලැබූයේ කවදාද? කවුරුන් විසින්ද?
19. එසේ නොකර තිබුණා නම්, එය බලවත් වරදක් බව ඔබ පිළිගන්නවාද?
20. මේ තරම් අක්රමිකතා, අතපසුවීම්, වගකීම් විරහිත බව, වංක ලෙස කටයුතු කර තිබෙන මුදල් ලේකම්වරයා කෙරෙහි ඔබට තවදුරටත් විශ්වාසයක් පවතින්නේ ද?
21. මෙහු එම ධූරය දරණ තාක් කල් සාධාරණ විමර්ශනයක් සිදු කළ හැකි බව ජනාධිපතිතුමන්/මුදල් අමාත්යතුමන් ලෙස ඔබට විශ්වාසයක් පවතින්නේ ද?
22. හර්ෂණ සුරියප්පෙරුම මහතා පුද්ගලයා වහා ක්රියාත්මක වන පරිදි මුදල් අමාත්යාංශ ලේකම් ධූරයෙන් ඉවත් කර නිසි විමර්ශයක් සිදු කිරීමට අවකාශය ඔබතුමන්ලා විසින් සලසා දෙන්නේ ද?
(Source- The Leader)
