මැද පෙරදිග පවතින අර්බුදය හේතුවෙන් එකවරම ගුවන් යානා ඉන්ධන මිල (Jet A-1)  86% කින් පමණ (ගැලුමක්  අමෙරිකානු ඩොලර් 4.26 දක්වා) ඉහළ යෑම නැගී එමින් පැවැති මෙරට සංචාරක කර්මාන්තය බිඳ වැටීමට හේතුවක් වන බව ආර්ථික විශ්ලේශකයෝ පවසති.
පසුගිය 10 වැනිදා වන විට  ගුවන් යානා ඉන්ධන මිල (Jet A-1) ගැලුමක් පැවතියේ  අමෙරිකානු ඩොලර් 2.29කටය. එය එක් රැයකින්  අමෙරිකානු ඩොලර් 4.26 කින් 86% ඉහළ නැංවීම ගුවන් යානා කර්මාන්තය, සංචාරක කර්මාන්තය ඇතුලු ඒ ආශ්‍රිත කර්මාන්ත රැසක බිඳ වැටීමට හේතුවී තිබේ.
 මෙලෙස ගුවන් යානා ඉන්ධන මිල ඉහළ යෑම නිසා ගුවන් ටිකට්පත් මිල වැඩි වීමට හෝ ගුවන් ගමන් වාර අඩු වීමට හෝ ඉඩ ඇති අතර, එය සංචාරක ක්ෂේත්‍රයට අහිතකර ලෙස සෘජුවම බලපානු  ඇත.

 සංචාරක ව්‍යාපාරය යනු හෝටල් පමණක් නොව, කුඩා හා මධ්‍ය පරිමාණ ව්‍යාපාර රැසක් පෝෂණය කරන ක්ෂේත්‍රයකි. මෙම අංශවල  විශාල පිරිසක් සේවය කරති. ඔවුන්ගේ රැකියාවන්  පවා අහිමිවීමේ අවධානමක් මේ මිල ඉහළ නංගීම තුළින්  සිදුවනු  ඇත.

 මැද පෙරදිග පවතින අර්බුදය මෙරටට අවස්ථාවක් කැර ගනිමින් ශ්‍රී ලංකාව ගුවන් සේවා ක්ෂේත්‍රයේ පවතින පිරිවැය බාධාවන් ඉවත් කළහොත්, ඉදිරි මාස කිහිපය තුළ සංචාරක කර්මාන්තය මෙරට ආර්ථිකයේ ශක්තිමත්ම කුළුණ බවට පත් වනු ඇතැයි ආර්ථික විශ්ලේෂකයෝ පවසති.
මැදපෙරදිග පවතින භූ-දේශපාලනික නොසන්සුන්තාවය සහ ගුවන් ගමන් පිළිබඳ පවතින අවිනිශ්චිතතාවය හේතුවෙන්, ශ්‍රී ලංකාවට ආරක්ෂිත, ස්ථාවර සහ වටිනාකමක් ඇති සංචාරක ගමනාන්තයක් ලෙස ඉදිරිපත් වීමට මහඟු අවස්ථාවක් ලැබී ඇත.
 වසර 2025වසරේදී ශ්‍රී ලංකාවට පැමිණි සංචාරකයින් සංඛ්‍යාව 2,362,521ක් වූ අතර, එය 2024වසරට සාපේක්ෂව 15.1%ක ශක්තිමත් වර්ධනයකි. ආරක්ෂාව සහ වැඩි දියුණු වූ සම්බන්ධතා මෙම වර්ධනයට ප්‍රධාන හේතු වී ඇත.

මෙම අවස්ථාව ප්‍රයෝජනයට ගැනීමට ඇති ප්‍රධාන බාධකය වන්නේ ගුවන් ඉන්ධන මිල ඉහළ යෑමයි. 2026 මාර්තු 11 දින සිට ගුවන් ඉන්ධන (Jet A-1) මිල 86% කින් පමණ (ගැලුමක්  අමෙරිකානු ඩොලර් 4.26 දක්වා) ඉහළ ගොස් ඇත.
මධ්‍යම පූර්ව කලාපයේ පවතින දැඩි භූ දේශපාලනික නොසන්සුන්තාවය, ගුවන් කලාපයන්හි අවහිරතා සහ සංචාරකයන් තුළ ඇති වී තිබෙන අවිශ්වාසය හමුවේ, ශ්‍රී ලංකාවට සිය සංචාරක කර්මාන්තය නව මානයකට ඔසවා තැබීමට සුවිශේෂී අවස්ථාවක් උදා වී තිබේ. මෙය හුදු ප්‍රවර්ධන වැඩසටහනක් පමණක් නොව, රටේ ජාතික ආර්ථිකය ශක්තිමත් කළ හැකි සුවිශේෂී අවස්ථාවකි.
වසර 2025 වසරේදී ගෝලීය සංචාරක වෙළෙඳපොළ දුර්වල නොවූ අතර, ජාත්‍යන්තර සංචාරකයන්ගේ පැමිණීම 4% කින් වර්ධනය විය. විශේෂයෙන් මධ්‍යම පූර්ව කලාපයට 2025 වසරේදී මිලියන 100කට ආසන්න සංචාරකයින් පිරිසක් පැමිණ ඇති අතර, එම කලාපයේ පවතින අවිශ්වාසී තත්ත්වය හේතුවෙන් ඉන් සුළු පිරිසක් හෝ ශ්‍රී ලංකාව වැනි ආරක්ෂිත සහ සුන්දර ගමනාන්තයක් වෙත යොමු කරවා ගැනීම විශාල ජයග්‍රහණයකි.
 ශ්‍රී ලංකාව දැනටමත් මෙම ගමන ආරම්භ කැර ඇත්තේ ශක්තිමත් පදනමක සිටය. ශ්‍රී ලංකා සංචාරක සංවර්ධන අධිකාරියේ දත්ත වලට අනුව, 2024වසරේදී පැමිණි 2,053,465ක සංචාරකයන් සංඛ්‍යාව 2025වසරේදී 2,362,521දක්වා 15.1%කින් වර්ධනය වී ඇත. විශේෂයෙන්ම 2025දෙසැම්බර් මාසයේදී පමණක් සංචාරකයින් 258,928ක් පැමිණ ඇති අතර, ගමනාන්තයේ ආරක්ෂාව සහ වැඩිදියුණු වූ සබඳතා මීට ප්‍රධාන හේතු වී ඇත. 
වර්තමාන සංචාරකයා සුඛෝපභෝගී පහසුකම් වලට වඩා ආරක්ෂාව, කාලසටහන් වල විශ්වාසනීයත්වය, ගුවන් ගමන් පහසුව සහ දැරිය හැකි මිල කෙරෙහි වැඩි අවධානයක් යොමු කරයි. වෙරළ තීරයන්, වනජීවී, උරුමයන්, ආයුර්වේදය සහ යෝග්‍යතා සංචාරක කර්මාන්තය වැනි විවිධත්වයකින් යුතු අත්දැකීම් සමූහයක් ඉතා කුඩා භූගෝලීය කලාපයක් තුළ ලබා දීමට හැකි වීම ශ්‍රී ලංකාව සතු සුවිශේෂී වාසියකි.
මෙය පවුල් පිටින් පැමිණෙන සංචාරකයින්ට මෙන්ම ‘ඩිජිටල් නෝමඩ්ස්’ (Digital Nomads) වැනි නවීන සංචාරකයින්ටද කදිම ගමනාන්තයකි.
කෙසේ වෙතත්, මෙම ස්වර්ණමය අවස්ථාව මගහැරී යෑමට බලපාන ප්‍රධාන තර්ජනයක් මතු වී ඇත. එනම් ගුවන් යානා ඉන්ධන (Jet A-1) මිල සීඝ්‍රයෙන් ඉහළ යෑමයි. දත්තවලට අනුව, 2026 මාර්තු 10 වැනි දින  අමෙරිකානු ඩොලර් 2.29 ක් වූ ගුවන් ඉන්ධන ගැලුමක මිල, මාර්තු 11 වන විට ඩොලර් 4.26 දක්වා 86% ක දැවැන්ත වර්ධනයක් පෙන්වා ඇත.
සංචාරක කර්මාන්තය යනු හෝටල් පවත්වාගෙන යාම පමණක් නොව, එය ප්‍රවාහනය, කුඩා හා මධ්‍ය පරිමාණ ව්‍යවසායකයින් සහ විදේශ විනිමය උත්පාදනය කරන සමස්ත ආර්ථිකයේම කොන්දේ පණ ගැන්වීමකි. එබැවින් මෙම ගැටලුවට විසඳුම් සෙවීම ජාතික අවශ්‍යතාවයකි.

 විදේශ රටක පවතින අර්බුදයක් මෙරටට අවස්ථාවක් කැර ගත හැකි ඉතා දුර්ලභ අවස්ථාවක් අප හමුවේ ඇත. ශ්‍රී ලංකාව තීරණාත්මකව ක්‍රියා කරමින්, ගුවන් සේවා ක්ෂේත්‍රයේ පවතින පිරිවැය බාධාවන් ඉවත් කළහොත්, ඉදිරි මාස කිහිපය තුළ සංචාරක කර්මාන්තය මෙරට ආර්ථිකයේ ශක්තිමත්ම කුළුණ බවට පත් වනු නොඅනුමානය.

(Source- The Leader)