අමෙරිකා එක්සත් ජනපදය සහ ඊශ්රායලය එක්ව ඉරාන ඉස්ලාමීය ජනරජයට එරෙහිව නීති විරෝධී ලෙස සිදු කරන ලද නවතම මිලිටරි ආක්රමණශීලී ක්රියාවන් සමාජවාදී ජනතා පෙරමුණ දැඩි ලෙස හෙළා දකිමින් නිවේදනයක් නිතුත් කැර තිබේ.
ලංකා සම සමාජ පක්ෂය, ශ්රී ලංකා කොමියුනිස්ට් පක්ෂය, ප්රජාතන්ත්රවාදී වාමාංශික පෙරමුණ සහ ශ්රී ලංකා මහජන පක්ෂය යන පක්ෂවලින් සැදුම්ලත් මෙම පෙරමුණේ ප්රධාන ලේකම් විශේෂඥ වෛද්ය ජී. වීරසිංහ මහතාගේ අත්සනින් නිකුත් කැර ඇති එම නිවේදනයේ තවදුරටත් මෙසේ සඳහාන් වේ.
ඉරානයේ උත්තරීතර නායක අයතුල්ලා අලි කමේනි , හිටපු ජනාධිපති අහමඩි නෙජාඩ් ඇතුළු ජ්යෙෂ්ඨ නායකයන් ගණනාවක් ඝාතනය කිරීමට අමෙරිකා එක්සත් ජනපදය සහ ඊශ්රායලය කළ ක්රියාව දරුණු අපරාධයක් බව මෙරට ප්රගතිශීලී ජනතාව දකින අතර ,එය දැඩි ලෙස සහ නිසැකවම හෙළා දකී. මෙම ප්රහාර සහ ඝාතනවලින් ජාත්යන්තර නීතිය බරපතළ ලෙස උල්ලංඝනය වීමක් සිදුව වී ඇති අතර, එක්සත් ජාතීන්ගේ සාමාජික රාජ්යයක ස්වෛරීභාවයට පහදීම, ලෝක යුද්ධයක් දක්වා වර්ධනය විය හැකි බවත්, එය පාලනය කළ නොහැකි ගැටුමක් බවත් පෙන්වා දීම වැදගත්ය.
මැද පෙරදිග යුද්ධයේ සහ ඉන් ඔබ්බට විකාශනය වන භූ-දේශපාලනික වර්ධනයන්හි දී ශ්රී ලංකාව සහ අමෙරිකා එක්සත් ජනපදය අතර වර්ධනය වන මිලිටරි සම්බන්ධතා පිළිබඳව සමාජවාදී ජනතා පෙරමුණ කනස්සල්ලට පත්ව සිටී.
ජාතික ජන බලවේග (NPP) ආණ්ඩුව හා එක්සත් ජනපදය අතර තිබෙන ගැඹුරු මිලිටරි සහයෝගීතාව සමාජවාදී ජනතා පෙරමුණ දැඩි ලෙස හෙළා දකී. එක්සත් ජනපද නාවික යාත්රා සහ ගුවන් සේවා යානා මෑතකදී ලබා දීම සහ එක්සත් ජනපදය අණදෙන නිලධාරීන් යටතේ මෙහෙයුම් ඒකාබද්ධතාවයකට පිවිසීම රටේ දිගුකාලීන නොබැඳි විදේශ ප්රතිපත්තිය භයානක ලෙස අතහැර දැමීමක් නියෝජනය කරයි. එය ඉරානයට එරෙහි එක්සත් ජනපද ජනාධිපති ට්රම්ප්ගේ නීති විරෝධී යුද්ධයට ශ්රී ලංකාව සම්බන්ධ වීමට පසුබිම සපයනු ලැබීමකි .
ආරක්ෂක අමාත්යාංශයට අනුව, එක්සත් ජනපදය දැන් ශ්රී ලංකා නාවික හමුදාවට (SLN) සහ ශ්රී ලංකා ගුවන් හමුදාවට (SLAF) එක්සත් ජනපද වෙරළාරක්ෂක යාත්රා හතරක් සහ TH-57 සී රේන්ජර් (බෙල් 206) හෙලිකොප්ටර් 10 ක් ලබා දී ඇත. මෙම ලබාදීම් මඟින්, ශ්රී ලංකාව, ඉන්දු-පැසිෆික් කලාපයේ එක්සත් ජනපද වෙරළාරක්ෂක යාත්රාවල සැලකිය යුතු හිමිකරුවකු සහ ක්රියාකරන්නෙකු බවට පත්කොට ඇත. රජය, මෙම ලබාදීම් මානුෂීය ආධාර සහ ආපදා සහන හැකියාවන් වැඩි දියුණු කිරීමක් ලෙස පෙන්නුම් කළද, යාත්රාවල මෙහෙයුම් ඉතිහාසය සහ පිරිවිතරයන් අඳුරු අරමුණු සඳහා සාක්ෂි සපයයි.
ඉහළ ඔරොත්තුදීමේ හැකියාවක් ඇති හැමිල්ටන් පන්තියේ කටර් දෙක ගැඹුරු මුහුදේ නිරීක්ෂණ සහ ඉහළ මුහුදේ මෙහෙයුම් සඳහා වඩාත් සුදුසු වෙරළ මුර සංචාර යාත්රා වේ. ඒවා වෙරළබඩ ආරක්ෂාව සඳහා පමණක් නොව, එක්සත් ජනපද නාවික හමුදා වාහක සටන් කණ්ඩායම් සමඟ බහුලව යොදවා ඇති යාත්රාවන්ය. ඒවා බල ප්රක්ෂේපණය සඳහා නිර්මාණය කර ඇති අතර, මැදපෙරදිග එක්සත් ජනපද මධ්යම අණදෙන (CENTCOM) මෙහෙයුම් සඳහා ශ්රී ලංකාව ඒකාබද්ධ කිරීම සඳහා භාවිතා කරනු ලැබේ.
මෙම යාත්රා මෙහෙයුම් සඳහා යෙදවීම දැනටමත් ආරම්භ වී ඇත. ඒකාබද්ධ කාර්ය සාධක බලකාය 153 (CTF 153) යටතේ ක්රියාත්මක වන රතු මුහුදේ සහ ඒඩන් බොක්කෙහි එක්සත් ජනපදය ප්රමුඛ “Operation Prosperity Guardian” සඳහා ශ්රී ලංකා නාවික හමුදාව එක් අක්වෙරළ මුර සංචාර යාත්රාවක් කැප කැර ඇත. මෙම කාර්ය සාධක බලකාය, ඒකාබද්ධ සමුද්රීය බලකාය (CMF) යටතට වැටෙන අතර, එයට, එක්සත් ජනපද නාවික හමුදා මධ්යම අණදෙන (NAVCENT) සහ බහරේනයේ මනමා හි මූලස්ථානය වන එක්සත් ජනපද පස්වන බලඇණියේ අණදෙන නිලධාරියා ලෙස සේවය කරන එක්සත් ජනපද නාවික හමුදා වයිස් අද්මිරාල්වරයෙකු විසින් අණ දෙනු ලැබේ.
මෙයින් අදහස් වන්නේ, ශ්රී ලංකා නාවික නිලධාරීන් සහ නැව්, දැන් එක්සත් ජනපදය ප්රමුඛ අණදෙන ව්යුහයන් යටතේ සෘජුව ම ක්රියාත්මක වන බවයි. එය, එක්සත් ජනපදයට එහි අණදෙන රාමුව තුළ ක්රියාත්මක විය හැකි නාවික හමුදාවක් සපයයි. ඉහළ මට්ටමේ මෙහෙයුම් සඳහා නාවික යාත්රා නිදහස් කරයි. ඵලදායී ලෙස අපගේ හමුදා අමෙරිකානු යුද යන්ත්රයේ කොටසක් බවට පත් කරයි.
මෙම ඒකාබද්ධතාවයේ ඉහළ මට්ටමක් සනිටුහන් කරමින්, ශ්රී ලංකාව 2025 ජනවාරි මාසයේදී ඒකාබද්ධ කාර්ය සාධක බලකාය 154 (CTF 154) හි අණදෙන නිලධාරි වගකීම භාර ගත්තේය. එක්සත් ජනපද පස්වැනි බලඇණිය යටතේ ක්රියාත්මක වන මෙම බහුජාතික සමුද්ර පුහුණු කාර්ය සාධක බලකාය, මැද පෙරදිග පුරා පිරිස් පුහුණු කිරීම සඳහා වගකිව යුතුය. මෙය ජාතික කීර්තියේ සලකුණක් ලෙස නොව, එක්සත් ජනපදය ප්රමුඛ සන්ධානයට වැඩි නීත්යානුකූලභාවයක් ලබා දෙන සහ අමෙරිකානු උපායමාර්ගික අරමුණු තුළ ශ්රී ලංකාවේ පැටලීම ගැඹුරු කරන ක්රියාවක් විය.
2025 නොවැම්බර් මාසයේදී ශ්රී ලංකා සන්නද්ධ හමුදා සහ මොන්ටානා ජාතික ආරක්ෂක බළකාය අතර රාජ්ය හවුල්කාරිත්ව වැඩසටහන (SPP) යටතේ ආරක්ෂක අවබෝධතා ගිවිසුමක් (MOU) අත්සන් කෙරුනු අතර, එය ශ්රී ලංකාව තුළ එක්සත් ජනපද හමුදා ව්යුහයන් ඒකාබද්ධ කිරීම සඳහා කඩතුරාවක් විය.
මෙය නොබැඳිකමක් නොවේ. එය පෙළගැස්මකි. එය එක්සත් ජනපද ඉන්දු-පැසිෆික් උපාය මාර්ගයට සම්පූර්ණයෙන්ම යටත් වීමක් වන අතර, එය වරක් අපගේ විදේශ ප්රතිපත්තිය නිර්වචනය කළ ස්වෛරීභාවය සහ සාමකාමී සහජීවනයේ මූලධර්ම සමච්චලයට ලක් කරයි.
අමෙරිකා එක්සත් ජනපදය සමඟ මෙම පෙළගැස්ම ක්ෂණික අනතුරක් ඇති කරයි. එනම්, අපගේ දිගුකාලීන මිතුරා වන ඉරානයට එරෙහිව, නීති විරෝධී එක්සත් ජනපද-ඊශ්රායල ආක්රමණයට ශ්රී ලංකාව ඇද දැමීමේ අවදානමක් ඇති කරයි.
මෙම තත්ත්වය තුළ සමාජවාදී ජනතා පෙරමුණ ඉල්ලා සිටින්නේ,
- ඉරානයට එරෙහි නීති විරෝධී එක්සත් ජනපද-ඊශ්රායල ආක්රමණයෙන් ශ්රී ලංකා රජය සහ සන්නද්ධ හමුදා වහාම විසන්ධි කිරීම.
- බහරේනයේ සහ රතු මුහුදේ එක්සත් ජනපද අණදෙන නිලධාරීන්ගෙන් ශ්රී ලාංකික නිලධාරීන් ඉවත් කැර ගැනීම ඇතුළුව එක්සත් ජනපද හමුදා සමඟ සියලු ඒකාබද්ධ හමුදා මෙහෙයුම් වහාම නතර කිරීම.
- අන්තර්ගතය තවමත් රහසිගත ඉන්දියා-ශ්රී ලංකා ආරක්ෂක අවබෝධතා ගිවිසුම සහ මෑත කාලීන එක්සත් ජනපද රාජ්ය හවුල්කාරිත්ව වැඩසටහන් ගිවිසුම ඇතුළු සියලුම ගිවිසුම් පිළිබඳ සම්පූර්ණ හෙළිදරව්වක් කිරීම,
- මෙම හමුදා ගිවිසුම් මඟින් එක්සත් ජනපද හමුදාවන්ට ශ්රී ලංකාවේ වරායන්, ගුවන්තොටුපොළවල් සහ හමුදා යටිතල පහසුකම් සඳහා ප්රවේශය ලබා දිය හැකි පූර්ණ හමුදා තත්ත්ව ගිවිසුමකට (SOFA) මඟ පාදන්නේද යන්න පිළිබඳ පාර්ලිමේන්තු පරීක්ෂණයක් කිරීම,
- විදේශීය බලවතුන්ගේ භූ දේශපාලනික අභිලාෂයන්ට නොව, ශ්රී ලාංකික ජනතාවගේ අවශ්යතාවලට සේවය කරන සැබෑ නොබැඳි විදේශ ප්රතිපත්තියකට නැවත පැමිණීම.
ජාතික ජන බලවේග ආණ්ඩුව වෙනසක් සඳහා වූ වේදිකාවක් මත තේරී පත් වූ නමුත්, එය දශක ගණනාවකින් පසු අපගේ ස්වෛරීභාවයේ වඩාත්ම සැලකිය යුතු ඛාදනයක් සඳහා පෙරමුණ ගෙන සිටී. යුද්ධය කරා යන මෙම නැඹුරුවට සහ අපගේ ජාතික නිදහස යටත් කිරීමට එරෙහිව, එක්සත් වන ලෙස අපි සියලු අධිරාජ්ය විරෝධී, දේශප්රේමී සහ ප්රජාතන්ත්රවාදී බලවේගයන්ගෙන් ඉල්ලා සිටිමු.
