දවුලගල පොලිස් වසමේ අලපලාවල ක්රීඩාංගණයේ දී මත්ද්රව්ය බවට සැක කෙරෙන රසායනික ද්රව්යයක් එන්නත් කරගත් තරුණයන් තිදෙනකු අතරින් එක් අයකු පෙරේදා (20) පස්වරුවේ මියගොස් ඇතැයි අනාවරණය වෙයි.
අසාධ්ය තත්ත්වයේ පසු වූ තරිඳු ලක්ෂාන් කුමාර නමැති 24 හැවිරිදි තරුණයා මාම්පිටිය ප්රාදේශීය රෝහලට ඇතුළත් කිරීමට රැගෙන යන අතරමඟදී මියගොස් ඇති බව පරීක්ෂණ මඟින් හෙළි වී ඇත. මළසිරුර පිළිබඳ පශ්චාත් මරණ පරීක්ෂණය ඊයේ (21) පේරාදෙණිය ශික්ෂණ රෝහලේ අධිකරණ වෛද්ය කාර්යාලයේ නීති වෛද්ය නිලධාරි පාලිත බණ්ඩාර සුබසිංහ මහතා සිදුකරනු ලැබ මරණය සම්බන්ධයෙන් විවෘත තීන්දුවක් ලබා දෙමින්, මිය තරුණයාගේ ශරීර කොටස් රසපරීක්ෂක වෙත යොමුකරන ලෙස නායෝග කෙළේය.
මියගිය තරුණයා සමඟ මත්ද්රව්ය බවට සැක කෙරෙන විස රසායනික ද්රව්ය එන්නත් කැරගත් අනෙක් තරුණයන් දෙදෙනාගෙන් පොලීසිය ඊයේ (21) දහවල් වනතුරුත් ප්රකාශයක් සටහන් කැර නොගැනීම සම්බන්ධයෙන් ප්රදේශවාසීහු පේරාදෙණිය රෝහලේ මෘත ශරීරාගාරය ආසන්නයේ දී දැඩි විරෝධතාවයක නිරත වී ඇත.
මියගිය පුද්ගලයා තවත් තරුණයන් දෙදෙනකු සමඟ යම් ද්රව්යයක් එන්නත් කරගනු දුටු බව 16 හැවිරිදි පාසල් සිසුවකු ප්රකාශ කැර තිබේ.
දවුලගල ප්රදේශයේ වෛද්යවරයකු තරුණයන්ට මත්පෙති අලෙවි කරන බවටද චෝදනා කරන ප්රදේශවාසීහු ඒ සම්බන්ධයෙන් පොලීසිය කිසිම ක්රියාමාර්ගයක් නොගන්නා බවට ද චෝදනා කරති.
මත්ද්රව්ය බවට සැක කෙරෙන රසායනික ද්රව්ය එන්නත් කැර ගැනීමෙන් පසු මියගිය තරුණයාට හුස්ම ගැනීමේ දැඩි අපහසුතාවක් ඇතිව තිබෙන බවත්, එම අවස්ථාවේ එක් තරුණයකු එම ස්ථානයෙන් පිටව ගොස් තිබෙන බවත් පොලිස් පරීක්ෂණ මඟින් අනාවරණය වී තිබේ. මියගිය පුද්ගලයාගේ මරණ පරීක්ෂණය ඊයේ (21) පස්වරුවේ සිදු කිරීමට නියමිතව තිබිණි.
(අසේල කුරුළුවංශ – දිනමිණට ලියන ලද ප්රවෘතියක් ඇසුරෙන්)
