දිට්වා සුළි කුණාටුව නිසා ඇති වූ දරුණු ගංවතුර සහ නායයෑම් හේතුවෙන් සැලකිය යුතු ජීවිත හානි සහ පුළුල් දේපොළ හානි සිදුවී ඇති බවත්, ශ්‍රී ලංකාවේ විපතට පත් වූවන්ගේ පවුල්වලට චීන ජනතාවගේ ශෝකය  පළ කරන බව ශ්‍රී  ලංකාවේ චීන තානාපති කාර්යාලය නිවේදනයක් නිකුත් කරමින්  කියා සිටි.

එම නිවේදනයේ  තවදුරටත් මෙසේද සඳහන් වෙයි.

ශ්‍රී ලාංකික සහෝදර සහෝදරියන්ගේ ආපදා සහන කටයුතු සඳහා සහාය වීමට , චීන රතු කුරුස සංගමය ශ්‍රී ලංකා රතු කුරුස සංගමයට  අමෙරිකානු ඩොලර් 100,000 ක හදිසි මුදල් ආධාර ලබා දී ඇති අතර, චීන රජයෙන් හදිසි ආධාර ලබා දීමට කටයුතු කරමින් සිටී. මේ අතර, ශ්‍රී ලංකාවේ චීන වාණිජ මණ්ඩලය සහ විදේශ චීන සංගමය පරිත්‍යාග මුලපිරීම් දියත් කළ අතර මේ වන විට බලපෑමට ලක් වූ කලාප සඳහා රුපියල් මිලියන 10 ක් එකතු කර ඇත.

ජනාධිපති අනුර කුමාර දිසානායකගේ ස්ථිර නායකත්වය යටතේ සහ ජාත්‍යන්තර ප්‍රජාවේ සාමූහික සහයෝගය ඇතිව, නිර්භීත ශ්‍රී ලාංකික ජනතාව නිසැකවම ව්‍යසනය ජය ගනු ඇති බවත්, සහයෝගීතාවයෙන් එක්සත් වී නුදුරු අනාගතයේ දී තම නිවාස නැවත ගොඩනඟනු ඇති බව අපගේ දැඩි විශ්වාසයි.

චන්දන විජේකෝන්

විසින්