ගෝඨාභය රාජපක්ෂ පාලන සමයේ රාජ්‍ය බුද්ධි සේවා ප්‍රධානියා ලෙස කටයුතු කළ විශ්‍රාමික මේජර් ජෙනරාල් තුවාන් සුරේෂ් සලේ ව 2026 වර්ෂයේ පෙබරවාරි 25 වැනි දින අපරාධ පරීක්ෂණ දෙපාර්තමේන්තුවේ (CID) නිලධාරීන්  පැලියගොඩ ප්‍රදේශයේදී අත්අඩංගුවට ගනු ලැබීය.

ත්‍රස්තවාදය වැළැක්වීමේ පනත (PTA) යටතේ මේ වන විට ඔහුව රඳවාගෙන සිටින අතර, ඔහුගේ අත්අඩංගුවට ගැනීම, විමර්ශන ක්‍රියාවලිය සහ රැඳවුම් කොන්දේසි සම්බන්ධයෙන් ඉතා බරපතළ, ත්‍රාසජනක මෙන්ම ආන්දෝලනාත්මක නීතිමය ගැටලු රැසක් මේ වන විට අධිකරණ ලේඛන හරහා එළියට පැමිණෙමින් තිබේ.
අප වෙත ලැබී ඇති විශ්වාසදායක නෛතික මූලාශ්‍ර සහ අධිකරණයට ඉදිරිපත් කැර ඇති ලේඛන මත පදනම්ව මෙම අත්අඩංගුවට ගැනීමේ යටි අරමුණු සහ නීතිමය පදනම පිළිබඳව මෙසේ අපගේ විශ්ලේෂණයක් ඉදිරිපත් කරන්නෙමු.

ඝාතන තැතක් සහ වස දීමේ දැඩි සැකයක්!

මෙම සිදුවීමේ වඩාත්ම කම්පන සහගත හෙළිදරව්ව වන්නේ සුරේෂ් සලේගේ ජීවිතයට එල්ල වී ඇතැයි පැවසෙන දැඩි තර්ජනයයි. අධිකරණය වෙත ඉදිරිපත් කැර ඇති කරුණු අනුව, සැකකරුව අපරාධ පරීක්ෂණ දෙපාර්තමේන්තුවෙන් පිටතට රැගෙන ගොස් ඔහුගේ ජීවිතයට හානියක් සිදු කිරීමේ උත්සාහයක් ඇති බවට සැක කිරීමට තරම් ප්‍රමාණවත් කරුණු ඇත.
එපමණක් නොව, ඔහුගේ ආහාර වලට වස මිශ්‍ර කැර ඝාතනය කිරීමට උත්සාහයක් පවතින බවට පවුලේ සාමාජිකයන් තුළ බියක් පවතින බවද නීතිඥ පාර්ශ්වයන් අධිකරණයට දන්වා තිබේ.

 ශ්‍රී ලංකා ජනරජය වෙනුවෙන් ඔහු විසින් ඉටු කරන ලද සේවාව නිසා ඔහුට ජීවිත තර්ජන ඇති හෙයින් ඔහුට නිවෙසින් ආහාර ලබාදීමට ඉඩ ලබාදෙන ලෙස ඔහුගේ බිරිය විසින් CID අධ්‍යක්ෂවරයාගෙන් ලිඛිතව ඉල්ලීමක් කැර තිබුණි. එහෙත් එම අනුමැතිය නිසි පරිදි නොලැබීම හේතුවෙන්, ඔහුගේ ආහාර නිවෙසින් ලබාදීමට පහසුකම් සැලසෙන අධිකරණ නියෝගයක් ලබා ගැනීමට මේ වන විට නීතිඥවරුන්ට සිදුවී ඇත. තවද, ඔහු රැඳවුම් නියෝග මත සිටින කාලය තුළදී වධදීමට, අනෙකුත් කෲර, අමානුෂික හෝ නින්දිත සැලකීම්වලට ලක්වීමට ඉඩ ඇති බවට ද සාධාරණ සැකයක් පවතින බව වාර්තා වේ.

 නීතිඥ-සේවාදායක රහස්‍යභාවය (Lawyer-Client Privilege) ඝාතනය කිරීම

නීතිය ඉදිරියේ කෙතරම් බරපතළ චෝදනාවක් එල්ල වූ අයෙකුට වුවද (මිනීමරුම් චෝදනාවක් ලද අයෙකුට වුවද), තමන් වෙනුවෙන් පෙනී සිටින නීතිඥයා සමඟ නිදහසේ සහ රහසිගතව සාකච්ඡා කිරීමට ඇති අයිතිය ලෝක සම්මත නීතිමය අයිතිවාසිකමකි.
සැකකරුගේ නීතිඥයන්ට අවශ්‍ය නීති උපදෙස් ලබා දීම සහ ලබා ගැනීම සඳහා පහසුකම් ලබා දෙන ලෙස සුරේෂ් සලේ ගේ බිරිය විසින් ඉල්ලා තිබුණි.
මීට අමතරව, සලේගේ නීතිඥවරයෙකු විසින් අපරාධ පරීක්ෂණ දෙපාර්තමේන්තුවේ අධ්‍යක්ෂවරයා වෙත සෘජුවම ලිපියක් යොමු කරමින්, නීතිඥ-සේවාදායක සන්නිවේදනයට අදාළ රහස්‍යභාවය සහ වරප්‍රසාද මුළුමනින්ම සුරැකෙන පරිදි සුදුසු පසුබිමක් තුළ තම සේවාදායකයා හමුවීමට අවස්ථාව ඉල්ලා ඇත.

නීතිමය ක්‍රියාවලියට සරදම් කිරීම!

එසේ තිබියදීත්, නීතිඥවරුන්ට තම සේවාදායකයා හමුවීමට නිසි ප්‍රවේශයක් ලබා නොදීම තුළින් ශ්‍රී ලංකා ආණ්ඩුක්‍රම ව්‍යවස්ථාවේ 13 වැනි වගන්තිය ප්‍රකාරව ඔහුගේ මූලික අයිතිවාසිකම් සහ නිශ්ශබ්දව සිටීමේ අයිතිය බරපතළ ලෙස උල්ලංඝනය කැර ඇත. නීති උපදෙස් ලබා ගැනීමේදී හා දීමේදී “නීතිඥ – සේවාදායක” සම්බන්ධතාවයේ මූලික සිද්ධාන්තයක් වන එකී උපදෙස් වල “රහස්‍යභාවය” රැකෙන පරිදි කිසිදු බාධා කිරීමකින් තොරව එය සිදු කිරීමට සතියකට දින දෙකක් (මධ්‍යහ්න 12න් පසුව) නීතිඥ ප්‍රවේශය ලබාගැනීම සඳහා අධිකරණ නියෝගයක් ඉල්ලා සිටීමට නීතිඥවරුන්ට සිදුව තිබේ.
නීතිඥවරයකු සහ සේවාදායකයකු අතර සිදුවන සාකච්ඡාවකට පොලිස් නිලධාරියකු වැනි තුන්වැනි පාර්ශ්වයක් සවන් දීම හෝ ඊට අසාධාරණ කොන්දේසි පැනවීම නීතිමය ක්‍රියාවලියට කරන බරපතළ සරදමකි.

අත්තනෝමතික පරීක්ෂාව සහ නීතිමය පදනමේ දුර්වලතා

මෙම අත්අඩංගුවට ගැනීම සහ රැඳවුම් නියෝග මත රඳවා තබාගෙන ඇත්තේ ඒ සඳහා ප්‍රමාණවත් සාක්ෂි අනාවරණය වීමකින් තොරව බවට නීතිඥවරුන් විසින් කරුණු දක්වා ඇති අතර, එම රැඳවුම් නියෝගය අභියෝගයට ලක් කරමින් නඩු පැවරීමක් සිදු කිරීමටද අපේක්ෂා කෙරේ.
තවද, අත්අඩංගුවට ගැනීමෙන් පසුව ඔහුව නිවස වෙත රැගෙන ආ අවස්ථාවේ, සෝදිසි වරෙන්තුවක් නොමැතිව CID නිලධාරීන් එම නිවසට ඇතුළු වී ඇත. ත්‍රස්තවාදය වැළැක්වීමේ පනත යටතේ නිවෙසක් සෝදිසි කිරීමට වරෙන්තුවක් අවශ්‍ය නොවන බව පවසමින් ඔවුන් නිවස සම්පූර්ණ පරීක්ෂාවකට ලක් කැර ඇති අතර, වඩාත් ගැටලු සහගත කරුණ වන්නේ කිසිදු කාන්තා පොලිස් නිලධාරිනියක් සහභාගි කැර ගැනීමකින් තොරව මෙම පරීක්ෂාව සිදු කැර තිබීමයි.

 මෙම සියලු නෛතික කරුණු සහ අධිකරණමය ලේඛන විමර්ශනය කිරීමේදී පෙනී යන්නේ, හිටපු රාජ්‍ය බුද්ධි ප්‍රධානියාගේ අත්අඩංගුවට ගැනීම හුදු නීතිමය විමර්ශනයකට එහා ගිය, මූලික අයිතිවාසිකම් සහ නීතිමය සම්ප්‍රදායන් බරපතළලෙස උල්ලංඝනය කෙරෙන අඳුරු ක්‍රියාදාමයක ස්වරූපයක් ගෙන ඇති බවයි. විශේෂයෙන්ම වස දීමේ තර්ජන පිළිබඳ සැකය සහ ලෝක සම්මත නීතිඥ සහාය ලබා ගැනීමේ අයිතිය අහිමි කිරීම හරහා, මෙරට අපරාධ යුක්ති විනිශ්චය පද්ධතියේ අපක්ෂපාතීත්වය කෙරෙහි බලවත් ප්‍රශ්නාර්ථයක් නිර්මාණය වී තිබේ.

(Source-The Leader)