කාබනික පොහොර සහ ගැඩවිල් පණු පොහොර ව්යාපෘතියක් හරහා ප්රතිලාභ දෙන බව පවසා මුදල් වංචා කළ කළමනාකරුවකු, එම ආයතනයේ බඩු භාණ්ඩ හොර රහසේ රැගෙන යෑමට පැමිණි අවස්ථාවේ විල්ගමුව ගම්වාසීන් කළ දැනුම් දීමකට අනුව විල්ගමුව පොලීසියෙන් ඔහු පෙරේදා (25) අත්අඩංගුවට ගෙන ඇත.
මේ වංචාකාර සමාගමේ හිමිකරු කෝටි ගණනක් මුදල් වංචා කැර මේ වන විට ප්රදේශයෙන් පළා ගොස් ඇත.
කාබනික පොහොර සමාගමේ කළමනාකාරීත්වය ගම්වාසීන් රවටා කෝටි ගණනින් මුදල් වංචා කර ප්රදේශයෙන් පළා ගොස් සිටින බවත්, ඔවුන් අත්අඩංගුවට ගෙන නීතියේ හමුවට ඉදිරිපත් නොකරන බව පවසමින් ගම්වාසීන් පිරිසක් එම ආයතනය ඉදිරිපිට විරෝධතාවක ද නිරත විය.
අදාළ සමාගම කාබනික පොහොර හා ගැඩවිල් පණු පොහොර ව්යාපෘතියක් විල්ගමුව ප්රදේශයේ ආරම්භ කරමින් ජනතාවට දැනුම් දී ඇත්තේ ලක්ෂ 03 සිට ලක්ෂ 12 දක්වා මුදලක් තම සමාගමේ ආයෝජනය කරන ලෙසයි. සමාගම ප්රදේශවාසීන්ට දැනුම් දී ඇත්තේ ගෙවත්තේ කාබනික පොහොර ටැංකි ඉදිකර ගන්නා ලෙසත්, මාස තුනෙන් තුනට ලක්ෂ 02 බැගින් එම කාබනික පොහොර වසරකට අවස්ථා 04කදී සමාගමට මිලදී ගැනීමට කටයුතු කරන බවත්ය. ඒ අනුව බොහෝ ගොවීන් මේ සමාගම සමඟ විල්ගමුව ප්රදේශයේ නීතිඥවරියක හමුවේ ද ගිවිසුම් ගත වෙමින් ලක්ෂ ගණනින් මුදල් ආයෝජනය කැර ඇත.
සමාගම ඉහත ආකාරයට නීතිඥයන් ඉදිරියේ ගිවිසුම් ගත වුවත්, එක් අවස්ථාවකදී ගොවීන් කිහිප දෙනකුගෙන් පමණක් පොහොර මිලදී ගෙන පසුව මේ සමාගමේ හිමිකරුවන් ප්රදේශයෙන් අතුරුදන් වී ඇති බවට සිද්ධියට මුහුණ දුන් ගොවීහු පවසති.
මේ ආකාරයෙන් හසලක, මොරයාය, මිණිපේ, විල්ගමුව, හෙට්ටිපොළ, ගිරාඳුරුකෝට්ටේ, දෙහිඅත්තකණ්ඩිය ආදී ප්රදේශ රැසක ගොවීන් 300කට අධික පිරිසක් මේ වංචාවට හසුවී මේ වන විට ලක්ෂ ගණනින් මුදල් අහිමි කරගෙන ඇත. ප්රදේශයේ විහාරස්ථානයක හිමිනමක් ද ලක්ෂ තුනක මුදලක් මේ සමාගමේ ආයෝජනය කැර මුදල් අහිමි කරගෙන ඇති බව පැවසේ.
මෙවන් පසුබිමක සමාගමේ හිමිකරුවන් හමුවීමට ගම්වාසීන් කොතෙක් උත්සාහ ගත්ත ද එයින් පළක් නොවූ තැන ඔවුන් විල්ගමුව පොලීසියේ මේ සම්බන්ධව පැමිණිල්ලක් ද ගොනු කැර කරනු ලැබ ඇත.
තමන්ගේ කනකර, රත්තරන් බඩු උකස් කර මුදල් ගෙවූ ජනතාව හඬා වැටෙමින් පවසා සිටින්නේ රත්තරන් බඩුවලට පොලී ගෙවන්න සිදුවී ඇති බවත්, මුදල් ආයෝජනයෙන් කිසිදු ප්රතිලාභයක් තමන්ට නොලැබූ බවත්, වංචාකාරි පිරිසකට තමන් හසු වු බවත්, ණයට ගත් මුදල්වලට තමන්ට මේ වන විට පොලී ගෙවන්න සිදුවී ඇති බවත්ය.
තත්ත්වය මෙසේ තිබියදී එම සමාගමේ සිටි ප්රදේශයේම පදිංචි එක් කළමනාකාරවරයකු එම සමාගමට අයත් කාර්යාලයේ ඇති බඩු භාණ්ඩ සහ උපකරණ හොර රහසේ ගෙන යෑමට තැත් කිරීමේදී පෙරේදා (25) මේ ගොවි මහත්වරුන් රැසක් එක් වී එම පුද්ගලයා පොලීසියට භාර දීමට කටයුතු කරනු ලැබීය. මේ වංචාව සම්බන්ධයෙන් පොලීසියේ පැමිණිලි සිදු කැර තිබියදී නීතිය ක්රියාත්මක නොවීම පිළිබඳ ගොවීන්ගේ විරෝධතාවක් ද පොලීසිය වෙත එල්ල විය.
නීතිය කඩිනමින් ක්රියාත්මක කර වංචනිකයන් කඩිනමින් අත්අඩංගුවට ගන්නා ලෙස පවසමින් ගොවීහු මේ ස්ථානයේදී විරෝධතාවක ද නිරත වූහ.
අත්අඩංගුවට ගත් පුද්ගලයා විල්ගමුව පොලීසිය විසින් නාඋල මහේස්ත්රාත් අධිකරණයට ඉදිරිපත් කිරීමට නියමිතව තිබුණි. විල්ගමුව පොලීසියෙන් වැඩිදුර විමර්ශන කටයුතු සිදු කෙරේ.
(දිනමිණ ඇසුරෙන්- මාපාකඩවැව සමූහ – එච්.එම්. රංජිත් කරුණාවීර)
