පාකිස්තාන – ඇෆ්ගනිස්තාන දේශසීමාව වසා දැමීම හේතුවෙන් සිය වෙළෙඳ කටයුතු සඳහා විකල්ප මාර්ග සොයා ගැනීමට තලේබාන් රජයේ අවධානය යොමු කැර ඇතැයි එරට කාමා පුවත් සේවය සඳහාන් කරයි. ඇෆ්ගනිස්තානය ජාත්යන්තර වෙළෙඳාමෙන් 40%ක් පාකිස්තානයේ ටොර්කම් සහ චමාන් දේශසීමා හරහා සිදුවන අතර, යුද ගැටුම් උත්සන්න වීම හේතුවෙන් ඇෆ්ගනිස්තානයේ වෙළෙඳ කටයුතුවලට දැඩි බලපෑම් එල්ල වී ඇතැයි ද කාමා පුවත් සේවය වැඩිදුරටත් සඳහාන් කරයි.
ඊට විකල්ප වශයෙන් ඉරානයේ චබහාර් වරාය හරහා ඉන්දියාව, උස්බෙකිස්තානය, ටර්ක්මෙනිස්තානය සහ කසක්ස්තානය වැනි රටවල් සමඟ වෙළෙඳ කටයුතු පුළුල් කැර ගැනීමට ගොඩබිම් සහ ගුවන් මාර්ග ඇතුළු විකල්ප මාර්ග භාවිත කිරීමට තලේබාන් රජය සැලසුම් කැර ඇත.
මෙයට පෙර පසුගිය වසරේ අගභාගයේදී සහ මේ වසරේ වැඩි කාලසීමාවක දේශසීමා යුද ගැටුම් හේතුවෙන් දෙරට අතර දේශසීමාව සති ගණනාවක් පුරා වසා දැමීමට සිදුවී ඇති බැවින් ඇෆ්ගනිස්තානයේ අපනයනකරුවන්ට අමෙරිකානු ඩොලර් මිලියන 200ක මාසික පාඩුවක් සිදු වී ඇතැයි ද කාමා පුවත් සේවය සඳහන් කළේය. දේශසීමා හරහා සිදුවන වෙළෙඳ කටයුතු අත්හිටුවීම ඇෆ්ගනිස්තානයේ උද්ධමනය ඉහළ යෑමට ද හේතු වී ඇති බව පැවසේ.
