හෝමූස් සමුද්ර සන්ධියේ අර්බුදය හේතුවෙන් ලොව විශාලතම තෙල් අපනයනකරු වන සවුදි අරාබියේ ඇරම්කෝ සමාගම ආසියාතික රටවලට බොරතෙල් සැපයුම සීමා කිරීමට තීරණය කැර ඇතැයි විදෙස් මාධ්ය සඳහාන් කරයි.
පසුගිය පෙබරවාරි මාසයේදී මිලියන 7.108ක දෛනික බොරතෙල් බැරල් ප්රමාණයක් ආසියාවට අපනයනය කළ ඇරම්කෝ සමාගම මේ මාසයේදී අපනයනය කැර ඇත්තේ මිලියන 4.355ක බොරතෙල් බැරල් ප්රමාණයක් පමණක් බවත්, හෝමූස් සමුද්ර සන්ධියේ අවහිරතාව මඟ හරවා ගැනීමට ලබන අප්රේල් මාසයේදී සිය ගැනුම්කරුවන්ට බටහිර දෙසින් පිහිටි යැන්බු වරාය ඔස්සේ රතු මුහුද හරහා සැහැල්ලු බොරතෙල් පමණක් අපනයනය කිරිමට තීරණය කැර ඇති බවත් විදෙස් මාධ්ය වැඩිදුරටත් සඳහාන් කරයි. ලාභදායි සහ වියදම් අඩු ඝන බොරතෙල් මත රඳා පවතින ආසියාතික වෙළෙඳපොළ ඇරම්කෝ සමාගමේ තීරණයෙන් තවදුරටත් බලශක්ති අර්බුදයකට තල්ලු වනු ඇතැයි විදෙස් මාධ්ය සඳහන් කරයි.
ඇරම්කෝ සමාගමේ විශාලතම තෙල් ආනයනකරු වන චීනය වාර්ෂිකව ඝන බොරතෙල් බැරල් මිලියන 500ක් පමණ ලබාගන්නා අතර, ඉන්දියාව, ජපානය, දකුණු කොරියාව ඇතුළු ආසියාතික රටවල් රැසක් ද සැලකිය යුතු ඝන බොරතෙල් ප්රමාණයක් ඇරම්කෝ සමාගමෙන් ආනයනය කරන බව සඳහාන් වේ. ඝන බොරතෙල්වලට අමතරව චීනය පිරිපහදුව පහසු කරවන සැහැල්ලු බොරතෙල් ද ඇරම්කෝ සමාගමෙන් ආනයනය කරන අතර, චීනයේ සිනෝපෙක් සමාගම රතු මුහුද හරහා මේ මාසයේදී සැහැල්ලු බොරතෙල් බැරල් මිලියන 24ක් ඇරම්කෝ සමාගමෙන් ආනයනය කැර ඇතැයි ද අනාවරණය වේ. ( දිනමිණ ඇසුරින්)
